MNEK Foun Sei Tau Kualidade iha Prioridade

0
281
Ministériu Negósiu Estranjeiru no Kooperasaun (MNEK). Foto: MNEK

DILI, (TATOLI) – Ministru Negósiu Estranjeiru no Kooperasaun (MNEK), Dionísio Soares Babo, sei tau kualidade iha prioriodade rua, hanesan polítika externa no dezenvolvimentu institusionál.

“Governu foun iha programa prinisipál mak atu lori diplomásia Timor-Leste nia ba iha nível ida aas liu, husi saida mak ita atinje ona. Tanba ne’e, presiza aponta iha buat importante rua. Ida, ba kondusaun polítika externa nian; iha pontu barak tebes ho prioridade sira ne’ebé mak sei determina bazea ba nesesidade polítika ou interese nasionál”, haktuir Babo iha MNEK, Praia dos Coqueiros, ohin.

Ministru ne’e hatutan tan dezenvolvimimentu kuadru institusionál atu reforsa kapasidade implementasaun polítika externa.

Tanba ne’e, tuir ministru Dionísio, buat rua ne’e sai hanesan pontu prinsipál husi governu nia ba tinan lima mai. Tanba ne’e atensaun maka’as tebes sei tau iha kualidade, iha kooperasun ida kualidade inkluindu kompeténsia kada servidór ou diplmata Timor-Leste no sira ne’ebé serbisu iha parte administrativa tanba sira ne’e mak sai hanesan portavóz ita-nia nasaun nian iha diplomásia timorense.

“Tanba ne’e, ho entrega pasta ohin, ita espera katak governu foun ne’e, depois estuda tiha hotu, sei formula i sei determina prioridade hotu bazea ba desizaun ne’ebé governu iha tiha ona ba tinan lima mai”, akresenta.

Kona-ba entrega no simu kargu husi ministru sesante ho nia vise, ministru Dionísio Babo apresia tebes ho serbisu membru governu konstisionál da-hitu ne’e.

“Ha’u apresia tebes ministru sesante no vise-ministra sesante, hamutuk ho funsionáriu sira tomak husi nível diplomata to’o iha jardineiru sira hotu, mai entrega pasta serbisu ne’ebé halo durante fulan sia nia laran i mós pasta serbisu tomak MNEK nian hodi bele kontinua iha tinan lima mai”, apresia.

Iha fatin hanesan, Ministru sesante, Aurélio Guterres, haktuir servisu negósiu estranjeiru no kooperasaun nian, ninia baze no referénsia prinsipál mak husi mak Planu Estratéjiku Dezenvolvimentu Nasionál, 2011-2030, liliu fokus ba iha pilár rua; ida mak kona-ba polítika externa Timor-Leste nian. Ida mak kona-ba esforsu reforsa dezenvolvimentu institusionál.

Ministru sesante ne’e informa, iha aspetu balun, nia ho nia vise Adalgiza Magno, inklui ministru Dionísio Babo, ko’alia antes ne’e, kona-ba Timor-Leste nia preparasaun ba ASEAN (Association of South East Asean Nation) nomós partisipasaun Timor-Leste nia iha eventu internasionál barak, liliu inisiativa husi Nasaun Unida nian, ne’ebé mak Timor-Leste ativa, partisipa.

Balun la’o hela, balun kontinua atu hala’o nafatin, iha nível rejionál inklui mós ita-nia relasaun ho CPLP (komunidade husi nasaun ho lian portugés-sigla portugés) nomós reforsu sira iha nível bilaterál, ne’ebé durante ne’e hala’o hela, ministru mai, serbisu relasaun externa Timor nian, dezde uluk kedas to’o agora kontinua la’o nafatin; atu ministru mai mós kontinua nafatin. Kontinua ho polítika foun ruma karik sei kontinua la’o ba oin.

Serbisu relasaun externa ho kualidade, presiza rekursu umanu ne’ebé kualidade, entaun mai kontinua reforsa, aposta iha formasaun ba diplomata sira, liliu atu hasa’e sira-nia koñesimentu, abilidade, liliu iha área linguístika; língua portugueza, ingleza, nune’e bele reprezenta interese Timor nian iha polítika externa Timor nian iha rai li’ur ho kualidade ida ne’ebé mak aas liu.

“Ida ne’e hala’o durante ne’e, ministru sei iha nia polítika no nia programa rasik, sei kontinua ba oin, depende ba ministru Dionísio Babo toma desizaun. Rekomendasaun sira prepara tiha ona iha livru, ohin formalmente entrega ba Ministru Dionísio Babo,” informa ministru sesante, Aurélio Guterres hodi konklui.

Entretantu, atividade entrega no simu pasta ne’e hala’o direta husi ministru sesante, Aurélio Guterres, akompañadu husi nia vise-ministra sesante Adalgiza Magno no simu direta husi ministru atuál, Dionísio Babo, liuhusi konferénsia imprensa.

Jornalista: Rafy Belo

Editora: Rita Almeida

HUSIK IDA HATÁN