DILI, (TATOLI) – Primeiru-Ministru, Marí Alkatiri, hateten rai ne’e presiza Governu ida ne’ebé maka ho programa tinan lima ba Parlamentu Nasionál nomós presiza orsamentu tinan 2018 nian maibé labele kontinua de’it ho orsamentu duo-désimu.
“Governu foun tenke la’o lalais, tenke aprezenta programa, tenke aprezenta orsamentu ba tinan 2018 nian no iha outubru no novembru mai ne’e tenke aprezenta mós proposta orsamentu ba tinan 2019 nian”, Marí hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e, hafoin soru-mutu dala ikus nian nu’udar Primeiru-Ministru Sétimu Governu Konstitusionál ho Prezidente Repúblika, Francisco Guterres Lú Olo.
Nia informa FRETILIN nu’udar partidu opozisaun bele asegura orsamentu jerál Estadu 2018 nian iha Parlamentu Nasionál maibé la’ós nar-naran asegura orsamentu refere.
“Bele asegura orsamentu maibé la’ós orsamentu ida ne’ebé nar-naran de’it ne’e. Se mai husu orsamentu ida ne’ebé maka la presiza, ami la vota afavór”, realsa.
Marí haktuir durante fulan ualu Sétimu Governu Konstitusionál ukun ne’e hatudu momoos katak sei bele ukun rai ida ne’e ho osan uitoan.
“Ami hatudu ona hosi janeiru to’o agora, katak, bele ukun rai ida ne’e ho osan ki’ik. La presiza osan boot tanba bainhira osan boot gasta la loos”, afirma.
Tinan ida ne’e, tuir nia, laiha fatin ona atu aprova Orsamentu Retifikativu tanba aprovasaun ba Orsamentu Retifikativu loloos hala’o iha tinan kotuk (2017).
“Agora prepara de’it orsamentu ba fulan neen nian, entaun, sira tenke husu osan fulan neen nian de’it. Se husu osan ba infraestrutura nian entaun iha fulan neen nia laran laiha infraestrutura, tanba infraestrutura ne’ebé agora dadauk la’o ne’e barak liu finánsia hosi Asia Development Bank”, katak.
“Se propoin orsamentu atu selu dívidas, entaun propoin de’it iha proposta orsamentu ba tinan 2019 nian. Uluk Ami husu Orsamentu Retifikativu atu selu dívidas ne’ebé sira rasik maka kria, sira dehan laiha tempu. Entaun, agora mós laiha tempu atu selu dívidas”, Marí reafirma.
Jornalista: Xisto Freitas
Editora: Rita Almeida
