Lere Husu Labele Demora Formasaun Governu

0
230
Majór Jenerál FALINTIL-Forsa Defeza Timor-Leste, Lere Anan Timur hatan jornalista sira iha Palásiu Prezidensiál, hafoin sorumutu ho Xefe Estadu. Foto Tatoli/Xisto Freitas.

DILI (TATOLI)—Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur husu atu labele dada formasaun Oitavu Governu halo kle’ur tanba hamosu impaktu ba ekonomia rai laran.

“Ohin Parlamentu foun hamriik tiha, forma estrutura meza Parlamentu no harii bankada sira, hosi ne’e bele harii ona Governu. Pelumenus to’o iha loron 16 Juñu Governu formadu ona no Governu ida ne’e tenke metin to’o tinan lima. Labele monu fali iha dalan klaran,” nia dehan kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e.

Atu Governu labele monu, nia sujere atu kria diálogu entre koligasaun ida ne’ebé manán eleisaun ho partidu sira seluk atu garante Governu nia durasaun ukun.

“Ita Timor ne’e nasaun ki’ik no kiak. Tanba ne’e maka di’ak liu diálogu ho parte ne’ebé kompetente para Governu labele monu. Ita nia líder istóriku sira hanesan Xanana Gusmão, Marí Alkatiti no Ramos Horta presiza túr hamutuk halo oinsá para Governu ne’e bele dura,” nia sujere.

Lere informa bainhira Governu monu sei hakat hikas ba iha eleisaun antesipada, maibé pesoalmente nia sei lakohi ba eleisaun antesipada. “Ha’u lakohi atu vota tan iha eleisaun antesipada. Ema ida la mai obriga ha’u atu ba eleisaun,” nia realsa.

Tuir nia katak labele kompara TL ho nasaun sira ne’ebé repete eleisaun antesipada hanesan Itália, España no Alemaña tanba nasaun hirak ne’e nia dezenvolvimentu la’o di’ak ona ka la fó impaktu ba ekonomia.

Iha biban ne’e, eis Komandante Rezisténsia ne’e afirma katak kuandu sai jenerál ona la’ós haree de’it ba militár maibé bele ko’alia mós polítika.

“Halo polítika ka tama partidu ida maka ladi’ak, maibé polítika ne’e ami bele ko’alia. Ami bele alerta Governu. Ami bele alerta Prezidente Repúblika nomós Parlamentu Nasionál,” nia esplika.

Jornalista: Xisto Freitas

Editór : Manuel Pinto

 

HUSIK IDA HATÁN