iklan

INTERNASIONÁL

Jornalista Timoroan Nain Rua Hetan Oportunidade Estájiu Professionál Iha Nova Zelándia

Jornalista Timoroan Nain Rua Hetan Oportunidade Estájiu Professionál Iha Nova Zelándia

DILI, (TATOLI) – Liuhosi koperasaun entre Konsellu Imprensa ho Nova Zelándia, haruka jornalista timoroan nain rua, Zevonia Vieira ho Augusto Sarmento, halo estájiu professionál iha área jornalizmu durante fulan lima iha Nova Zelándia.

KI Nova Zelándia halo komunikasaun ho KI Timor-Leste liuhosi sira nia embaixada hodi fó oportunidade estájiu professionál ba jornalista timoroan.

Vaga ne’e loke iha loron 29 setembru tinan kotuk no konsege hetan aplikasaun husi ema nain lima. 

Mesmu aplikasaun ba vaga ne’e uitoan, maibé prosesu la’o nafatin to’o selesaun dokumentu nain tolu konsege liu no etapa ikus, iha prova orál nain rua mak liu.

Prezidente KI, Virgílio da Silva Guterres, hateten hanesan tradisaun ida KI ezekuta mandatu ne’ebé mak membru kontribui atu dezenvolve padraun jornalizmu nian, nune’e ikus mai bele produz informasaun ne’ebé kualidade ba públika.

“KI Timor-Leste no KI Nova Zelándia nia koperasaun mosu tanba iha pontu ida mak dehan oinsá membru KI ne’ebé hanesan orgaun reguladora komunikasaun sosiál rejiaun rua bele kompartilla esperiénsia nomós bele kompartilla rekursu”, tenik iha konferénsia imprensa konjunta KI ho embaixada Nova Zelándia iha Palásiu Governu, sesta (22/6).

Virgilio hatutan dezenvolvimentu demokrasia iha nasaun pasífiku hanesan Austrália, Nova Zelandia, Papua Nova Guinné avansadu liu kompara ho nasaun sudeste aziátiku hanesan Timor-Leste, tanba ne’e sira bele kompartilla rekursu balun hodi loke espasu ba jornalista sira atu bele hetan esperiénsia.

Prezidente KI dehan tan aproveitamentu ne’ebé mak sira halo durante estájiu, benefísiu no komportamentu ida ne’e mak sei determina dehan kooperasaun KI entre nasaun rua ne’e bele kontinua ou la’e, tanba oportunidade ne’e sei nakloke ba kooperasaun ba oin.

“Kooperasaun ninia portaun imi nain rua mak loke, atu kontinua loke depende sira, sei odomatan tama mós sira mak deside”.

Nia husu ba sira nain rua hodi bele esforsu no atensaun no buka oportunidade tanba abilidade ita bele aprende mas paixaun ema ida labele hanorin, ida ne’e mosu ho naturál hanesan mós profisaun jornalizmu.

Ba sira nain rua husu atu esforsu no atensaun iha ne’eba no buka oportunidade ne’e hotu iha tempu servisu no livre buka atu haree saida mak seidauk.

“Abilidade ita bele aprende mas paixaun ema ida labele hanorin, ida ne’e mosu ho natural hanesan mós profisaun hanesan jornalizmu”.

Virgílio mós agradese ba KI no embaixada Nova Zelándia ne’ebé mak fó apóiu tomak hodi fasilita prosesu ne’e, nune’e mós mídia Tafara ne’ebé bele husik ninia xefe redasaun, Zevonia nomós Timor Post ne’ebé husik ona ninia editór, Augosto Sarmento atu buka esperiénsia liuhosi estájiu profesionál.

Iha parte seluk, Zevonia agradese ba KI tanba esforsu ne’ebé mak halo konsege loke ona odomatan ba instituisaun mídia sira hodi fó oportunidade ba jornalista sira hodi kapasita sira nia án, la’ós de’it iha rai laran maibé bele mós hetan esperiénsia iha rai liur.

“Apresia ba konferénsia Imprensa ne’ebé mak halo realidade ami nia esperansa mak sempre ami ezije”, tenik.

Nia mós iha esperansa bele lori esperiénsia hosi ne’eba atu bele kuda iha instituisaun ne’ebé mak sira halo kna’ar ba nomós fahe tutan ba jornalista foun sira ne’ebé mak espíritu halarak sai jornalista profesionál.

Entretantu, Zevonia sei halo estájiu profesionál iha mídia imprimi diáriu, New Zeland (NZ) Herald no Augosto sei destaka iha mídia online Nautical Chart.

Biban ne’e mós aproveita KI entrega billete no halo despedida ba jornalista nain rua ne’ebé sei aranka iha sábadu (23/6).

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!