Embaixadór Neen Entrega Karta Kredensiál Ba Prezidente Repúblika

0
226
Embaixador Tailándia entrega karta kredensiál ba Prezidente Repúblika, Francisco Guterres Lú Olo no akompañadu hosi Ministru Negósiu Estranjeiru no Kooperasaun, Aurélio Cristóvão Guterres. Imajen Mídia Prezidénsia Repúblika.

DILI, (TATOLI) – Embaixadór sira hosi nasaun neen entrega karta kredensiál ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, kinta ne’e.

Embaixadór hirak ne’e hosi Reinu Tailándia, Danai Karnpoj, Ordem Soberana de Malta, Egbert Collin Yap, Repúblika de Namibia, Anne Namakau Mutelo, Geórgia, Irakli Asashvili, Federasaun da Russia, Lyudmila G. Vorobieva no Repúblika da União de Myanmar, Daw Ei Khin Aye.

Ministru Negósiu Estranjeiru no Kooperasaun, Aurélio Cristóvão Guterres, haktuir diplomata sira ne’e sei hala’o misaun diplomátika iha Timor no kompromete reforsa kooperasaun bilaterál iha área agrikultura, edukasaun, saúde, petrolífera (mina no gás), formasaun no apoiu Timor-Leste nia adezaun ba ASEAN.

Iha Timor-Leste, Aurélio haktuir, eziste embaixada rezidente maka Brazíl, Uniaun Europeia, Estadus Unidus Amérika, Indonézia, Tailándia, Malázia, Portugal, Austrália, Filipina, Kuba no embaixadór naun rezidente ne’e normalmente sira hela iha rai seluk maka regularmente mai vizita Timor.

Prezidente Repúblika agradese apoiu sira ne’ebé maka nasaun sira ne’e apoiu ba Timor no Prezidente mós espresa Governu foun mai sei kontinua reforsa kooperasaun sira ne’e no sei materializa atividade sira balun liu-liu kooperasaun nível tékniku.

Jornalista: Xisto Freitas

Editora: Rita Almeida

HUSIK IDA HATÁN