Deputadu Arão Noé Eleitu ba Prezidente PN Lejizlatura Dalimak

0
1082
Arão Noé Da Costa Amaral,Prezidente Parlamentu Nasionál

DILI (TATOLI)—Deputadu/a lejizlatura dalimak liuhosi eleisaun iha Parlamentu Nasionál, Ohin, hili Deputadu Arão Noe hosi Bankada CNRT, hodi sai Prezidente Parlamentu Nasionál, atu lidera lejizlatura dalimak durante tinan lima.

Kandidatu ho lista úniku hosi Bloku Koligasaun Aliansa Mudansa ba Progresu (AMP) sai Prezidente PN hodi troka Prezidente Sesante, Aniceto Guterres (Deputadu FRETILIN) ho votu avabor 36, kontra 29, abstain zero, hosi deputadu na’in 65, ne’ebé fahe ba AMP na’in 34, FRETILIN, 23, Partidu Demokrátiku na’in 5 no Frente Dezenvolvimentu Demokrátiku na’in 3.

“Kandidatu úniku deputadu Arão Noé Da Costa Amaral, eleitu ba Prezidente Parlamentu Nasionál,” Prezidente PN sesante Aniceto Guterres deklara, iha plenária, ohin.

Prezidente Parlamentu Nasionál lejizlatura dalimak, Arão Noé iha nia diskursu promete katak durante nia mandatu sei kumpre konstituisaun no Rejimentu Parlamentu Nasionál, hodi serve povu Timor.

“Ha’u sei sai de’it sai de’it portavós ba parlamentu nasionál, la iha pleno poderes. Podér iha deputadu ida-idak nia liman, Tanba ne’e, durante hala’o knaar, ha’u sei hala’o no kumpre de’it konstituisaun, no rejimentu PN hodi servisu povu Timor-Leste tomak.” Arão promete.

Husu mós ba deputadu na’in 64 iha Parlamentu Nasionál atu haluha diverjénsia polítika, tanba eleisaun liu ona, maibé fó liman ba malu hodi hala’o knar atu halo fiskalizasaun, no rekolla povu nia lian hodi hato’o ba governu.

“PN mós tenke hadi’a an nafatin tuir evolusaun dezenvolvimentu global, atu nune’e ajuda hadi’ak povu nia moris,” nia afirma.

Enkuantu nia la haluha agradese ba Prezidente PN sesante Aniceto Guterres ho Primeiru Ministru, Mari Alkatiri ba sira nia prestasaun servisu durante ne’e.

“Lá haluha mós agradese ba Kay Rala Xanana Gusmão, Taur Matan Ruak, no Naimori, imi nia konfiasa mak ha’u nia determinasaun,” nia agradese.

Jornalista : Zezito Silva

Editór : Manuel Pinto

HUSIK IDA HATÁN