Austrália Prontu Koopera ho TMR Nia Governu

0
157
Primeiru Ministru Taur Matan Ruak Asina termu pose iha Prezidente Repúblika, Francisco Guterres Lú Olo nia oin, iha ámbitu serimónia tomada pose, iha Palásiu Nobre, foin lalais ne’e.

DÍLI, (TATOLI)-Nasaun viziñu Austrália konsidera katak tomada de pose ba primeiru-ministru, Taur Matan Ruak ho nia membru sira, hodi lidera governu konstitusionál da-walu nu’udar oportunidade di’ak atu koopera.

“Entaun, agora dadaun bele hametin kooperasaun, partikularmente tanba asina ona akordu kona-ba fronteira marítima, entaun agora dadaun oportunidade di’ak atu hametin kooperasaun,” hateten embaixadór Austrália, Peter Roberts, ba Ajénsia TATOLI, iha fim-de-semana ne’e, iha Lahane-Díli.

Embaixadór Austrália, Peter Roberts. Foto: twitter.com/ausambdili

“Partikularmente, Austrália hakarak haforte kooperasaun iha área dezenvolvimentu, ekonomia no seguransa. Ha’u hanoin katak nu’udar viziñu, nu’udar parseiru, nu’udar kolega, Austrália no Timor-Leste, bele koopera didi’ak,” reforsa diplomata australianu ne’e.

Embaixadór Peter Roberts mós demonstra katak Austrália, liliu nia parte, kontente tebes bele haree tomada de pose oitavu governu konstitusionál husi Prezidente Repúblika, Francisco Guterres, Lú-Olo.

Nune’e mós, sente kontente ho afirmasaun Primeiru-ministru, Taur Matan Ruak kona-ba halo relasaun di’ak ho nasaun viziñu sira inkluzivamente Austrália no Indonézia.

“Ha’u kontente tebes primeiru-ministru ko’alia kona-ba relasaun ho Austrália, ha’u konkorda relasaun entre Austrália no Timor-Leste importante tebes,” manifesta embaixadór Australianu, Peter Roberts.

Jornalista: Rafy Belo

Editór : Manuel Pinto

HUSIK IDA HATÁN