AMP Hakarak V Lejizlatura Simplifika Bankada

0
306
Primeiru Vice Prezidente Parlamentu Nasional Angelina Sarmento.

DILI (TATOLI) –Primeira Vice Prezidente Parlamentu Nasionál, Maria Angelina Lopes Sarmento informa Bankada Aliansa Mudansa ba Progresu (AMP) ne’ebé kompostu husi bankada CNRT, PLP no KHUNTO hakarak simplifika komisaun espesializada permanente ba neen no tau hamutuk área temátika ne’ebé mak hanesan.

Opiniaun AMP ne’e hato’o ona iha, iha reuniaun líderes bankada ohin.  Durante enkontru ne’e diskute konaba konstituisaun komisaun espesializada permanente líderes bankadas sira bele deside konaba númeru komisaun espesializada permanente ne’ebé Parlamentu Nasionál (PN) presiza, atu bele hala’o knar fiskalizasaun ba servisu sira ne’ebé governu iha. Tanba ida ne’e, AMP hakarak propoin komisaun espesializada neen hodi tau hamutuk komisaun ne’ebé mak ladún relevante ho situasaun atuál.

“Bazeia ba IV lejizlatura liubá, komisaun espesializada permanente iha hitu maibé iha lejizlatura ida agora bankada AMP hakarak propoin komisaun espesializada neen, ho  mudansa husi komisaun espesializada permanente hitu ne’ebé mak mai husi IV lejizlatura hodi komisaun balun tau hamutuk no komisaun balun ne’ebé ladún relevante ho situasaun agora bele hasai ou bele tau hamutuk”, tenik ba jornalista sira hafoin remata reuniaun líderes bankada iha PN.

Nia mós akresenta, iha proposta rua ne’ebé mak sei tau ba ajenda hodi halo debate iha plenária aban mak mantein ho komisaun hitu husi IV lejizlatura no ida tan mak sei hamenus komisaun ba neen de’it.

“Hamenus komisaun ho razaun katak komisaun sira ne’ebé kuaze atu hanesan bele tau hamutuk iha komisaun ida atu nune’e bele viabiliza mós governu bainhira mai presta ou resposta perante Parlamentu Nasionál, relativamente ministériu sira ne’ebé mak relevante ho komisaun espesializada sira”, nia esplika tan

Tuir AMP nia proposta sujere atu hasai komisaun G ne’ebé iha IV lejizlatura ninia kobre área temátika mak sidadania, kultura, juventude, desportu no igualdade jéneru, ba hamutuk fali komisaun A, ne’ebé iha lejizlatura anterior área temátika mak konstitusionais.

Alende ne’e, área temátiku, kultura, juventude, desportu no igualdade jéneru bele tau hamutuk iha komisaun F, inklui iha asuntus sosiais ne’ebé mak área temátiku hirak ne’e bele toma konsiderasaun nu’udar  parte ida husi komisaun F,  sei reflete mós asuntu sosiais.

Entretantu iha IV lejizlatura, komisaun espesializada permanente iha hitu ho área temátiku mak: Komisaun A trata asuntu konstitusionalizmu, justisa, administrasaun públika, podér lokál, anti korrupsaun no étika, Komisaun B trata asuntu negósiu estranjeiru, defeza no seguransa nasionál, Komisaun C trata asuntu finansas públika, Komisaun D trata asuntu ekonomia no dezenvolvimentu, Komisaun E trata asuntu infraestrutura, transporte no komisaun, Komisaun F trata asuntu saúde, edukasaun, kultura, veteranu no igualdade jéneru, no Komisaun G trata asuntu  sidadania, kultura, juventude, desportu no igualdade jéneru.

Komisaun hitu ne’e lidera husi deputadu/a IV lejizlatura na’in 21 ne’ebé kompostu husi Prezidente, Vise Prezidente no Sekretáriu.

Jornalista: Julia Chatarina

Editór : Manuel Pinto

HUSIK IDA HATÁN