Prezidente-Repúblika, Francisco Guterres Lú Olo, bainhira to’o iha Aeruportu Internasionál Prezidente Nicolau Lobato, Bairru Pité, Dili, sábadu (30/6), simu hosi Primeiru-Ministru, Taur Matan Ruak. Imajen Ajénsia Tatoli/Xisto Freitas.

DILI, (TATOLI) – Prezidente-Repúblika (PR), Francisco Guterres Lú Olo, manifesta gratidaun ne’ebé boot ba timoroan hothotu ne’ebé solidariza ninia vizita ba Indonézia liuhusi mensajen.

“Ne’e sentidu solidariedade forte teb-tebes nomós apoiu morál no polítiku ida boot ba Prezidente-Repúblika, para bele hala’o kna’ar ida ne’ebé konstituisaun no povu fó ba nia”, Xefe-Estadu hato’o ba jornalista sira liuhusi konferénsia ba imprensa iha Aeruportu Internasionál Prezidente Nicolau Lobato, Komoro, sábadu ne’e hafoin fila hikas hosi vizita Estadu ba Indonézia hahú hosi 27 to’o 30 juñu.

Xefe Estadu haktuir vizita ne’e kontextu prinsipál hametin relasaun, nune’e Timor-Leste ho Indonézia kontinua kaer liman hamutuk atu hateke ba futuru.

Biban ne’e, Ministru Negósiu Estranjeiru no Kooperasaun, Dionísio Soares Babo, hatutan asuntu sira ne’ebé Xefe-Estadu nasaun rua ko’alia maka kooperasaun iha nível oi-oin hanesan edukasaun (liu-liu interkámbiu estudante sira).

Babo haktuir Governu Indonézia promete tinan oin fó bolsa lima ba timoroan sira liuhusi Governu Timor, ko’alia konetividade iha parte terrestre, ne’ebé nasaun rua asina ona iha tinan kotuk kona-ba dezenvolvimentu Ponte Mota-Ain (Maliana), atu fasilita konetividade ho Indonézia iha área fronteira.

Aleinde ne’e, Babo hatutan desktuti mós fronteira marítima ho terrestre, iha ne’ebé nasaun rua hanoin katak importante atu diskute para rezolve detallu liu iha segmentu rua iha fronteira terrestre ne’ebé fó impaktu ba segmentu fronteira marítima nian.

“Nasaun rua konkorda ona atu rezolve asuntu ne’e ho lais para bele fó rezultadu ne’ebé di’ak ba nasaun rua”, subliña.

Ministru realsa viajen ne’e mós inklui emprezáriu timoroan lubuk ida partisipa iha Forum Bisnis entre emprezáriu timoroan no Indonézia hodi identifika dezenvolvimentu ekonomia ne’ebé setór privadu hosi nasaun rua serbisu hamutuk no kompromitidu sei hasai dupla tribulasaun nune’e labele selu tasa.

Jornalista: Xisto Freitas

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here