DILI, (TATOLI) – Autoridade Inspesaun no Fiskalizasaun Atividade Ekonómika no Sanitária (AIFAESA) iha selebrasaun aniversáriu ba daruak hala’o atividade limpeza jerál hodi bolu konsiénsia umana atu  hamoos ambiente, tanba nia mak espasu ba ema moris tan ne’e tenke kuidadu.

Koordenadór Interinu AIFAESA, Joanico da Costa Soares, hatete atu festeza loron institutu ne’e lahalo atividade importante tuir kompeténsia AIFAESA ho razaun difikuldade orsamentu ne’ebé Governu hasoru liuliu ho rejime duodésimu.

“AIFAESA foti inisiativa halo limpeza jerál no selebra misa agradesimentu. Atividade ami halo iha fatin rua hamoos iha mota-ninin sira tanba mota mak sai fonte atu lalin foer sira bá tasi”, Joanico dehan iha Bidau, ohin, bainhira hala’o hela atividade hili lixu iha mota-laran.

Tuir nia haree mota-laran mesak nakonu ho foer de’it, ida ne’e halo parte iha konsiénsia abitante bá oin tenke tau atensaun ba ambiente no atividade hanesan hala’o mós iha merkadu Taibesi hanesan sentrál komersiál.

Bainhira ko’alia sobre atividade ekonómika entre operadór ekonómika ho konsumidór entaun sira mós aleinde halo atividade komersiál, konsumidór bá hola sasán maka presiza kuidadu ambiente maka hamoos lixu.

“Kuandu ambiente foer ita fa’an sasán sira ne’e bele mosu kontaminasaun ruma, foer sira butuk hamutuk lalar ba hobur no semo fali bá sasán ne’ebé fa’an no bainhira ita bá hola fali bele prejudika mós ita-nia saúde”.

Hanoin ida ne’e importante oinsá komunidade en jerál bele toma konsiénisa ba ambiente atu ita hotu bele asume responsabilidade hanesan umanu oinsá kuidadu ambiente, katak.

Jornalista: Maria Auxiliadora

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here