Reuniaun dahuluk Sekretáriu Estadu Kooperativa, Arsenio Pereira da Silva ho funsionáriu no kargu xefia sira. Foto/Facebook Sekretáriu Estadu Kooperativa.

DILI, (TATOLI) – Sekretáriu Estadu Kooperativa, Arsénio Pereira da Silva, hatete kooperativa barak mak harii, maibé kuaze barak mós lala’o, tanba ne’e liuhusi  polítika Governu Konstitusionál Daualuk nian oinsá eleva kooperativa instituisonálmente nomós hadi’ak jestaun para hamriik ho di’ak.

“Dezenvolvimentu ba kooperativa ne’e ita hakarak oinsá mak kooperativa ne’e sai pilár fundamentál ida liuliu ba ekonomia. Tanba ne’e mak Sekretáriu Estadu Kooperativa ne’e iha ministru koordenadór asuntu ekonómiku nia okos oinsá haree kooperativa produtiva sira ne’e bele prodús nomós sira bele muda ekonomia uma-laran”, Arsénio afirma ida ne’e iha Bairru-Pité, ohin, bainhira hala’o vizita iha departamentu sira ne’ebé hakmahan iha Diresaun Jerál Kooperativa nia okos.

Governante ne’e hatutan ida ne’e mak importante no tuir planu estratéjiku ne’ebé halo ne’e di’ak para bele hatene nia alvu.

“Kooperativa lubuk ida ne’ebé harii mas kuaze porsentu 10 to’o 15 maka la’o di’ak, mas barak mak la’o hakdasak hela entaun dezenvolve ida ne’e ho di’ak liu”.

Diretór Nasionál Kooperativa Mikro no Pekena Empreza, Reinaldo Borges, hatete kooprativa iha Timor-Leste hamutuk 191 husi ramu neen mak kréditu uniaun, multi sektorál, agrikultura, peska, pekuária no indústria, maibé balun la la’o.

“Bazea ba dekretu lei númeru 16/2004 ne’e iha tipu (kooperativa) 13 ne’ebé presiza atu estabelese iha Timór, maibé realidade ita foin iha neen tanba restu ne’e haree ba oportunidade ne’ebé ita bele halo. Lei fó dalan ba ida ne’e, maibé ita haree rekursu, populasaun no ema ne’ebé tenke iha duni espíritu ida atu harii ida ne’e, tanba ne’e mak iha neen de’it mak iha posibilidade para bele la’o daudaun”.

Ramu kooperativa ne’ebé iha hanesan kréditu uniaun ho totál 96 ho nia totál asset U$6,125,496.56 husi membru hamutuk 12.679 no iha tolu ka haat mak hetan apoia husi orsamentu subvensaun públika no maioria halibur osan husi komunidade sira.

Multi sektorál hamutuk 52 no asset ne’ebé iha U$515,413.57 husi membru hamutuk 1.642. Agrikultura iha 19 ho membru 368 no asset ne’ebé iha U$52,213.25, peska iha 15 ho nia membru 369 no asset hamutuk U$24,122.52. Pekuária iha 3 ho membru 185 no asset ne’ebé iha U$982.00 no indústria iha neen, asset U$17.899.00 ho membru hamutuk 83.

“Ami define buat ne’e ba rua, ida kooperativa finanseira mak halibur osan, hanorin komunidade sira atu hahú aprende poupa no non finanseira mak hahú ho sektorál ka dezenvolve setór sira seluk, maibé rekursu finanseiru ne’ebé ita-nia populasaun iha ne’e limitadu tebes”.

Nune’e iha kooperativa multi sektorál ne’e difisil lahalimar tanba atu halo investimentu ida presiza kapitál no rekursu. Entaun kooperativa ramu lima seluk eseptu kréditu uniaun presiza fundu atu investe.

“Ida ne’e mak halo dalaruma sira laiha kompromisu ida atu kontinua no mate ou dalaruma Governu fó osan ba sira liuliu setór la’ós feinanseiru, mas ita fó mil ou dois mil dólar ne’e atu halo saida?”.

Nune’e diresaun haree hela situasaun ne’e tanba haree ba lista númeru kooperativa sa’e mas serbisu lala’o tanba menus iha rekursu umanu, ekipamentu no kapitál.

Jornalista: Maria Auxiliadora

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here