DILI, (TATOLI) – Parlamentu Nasionál (PN) ohin hala’o atividade akolimentu (ospitalidade, hahalok fó benvindu), hodi fahe esperiénsia ba malu entre deputadu tuan ho foun, en-relasaun funsaun lejislatura nian.
“Importante tebes ba programa ne’e, tanba atu bele fahe koñesimentu ba distintu deputadu sira foun ba funsionamentu parlamentár ho razaun katak haree ba rezultadu eleisaun iha 2018, pursentu 60 resin deputadu foun”, hatete Prezidente PN, Arão Noe, liuhosi abertura programa ne’e iha uma fukun.
Programa ne’e pertinente atu fó kapasitasaun ba deputadu foun, atu bele iha koñesimentu kle’an ba funsionamentu parlamentu nian oinsá deputadu sira bele ezerse kna’ar ho di’ak tuir rejimentu parlamentu nian, tuir estatutu deputadu ne’ebé sai baze hodi regula funsionamentu parlamentár.
“Ha’u hein katak oportunidade ne’e distintu deputadu sira bele aproveita di’ak hodi asume ho responsabilidade atu hatene di’ak funsionamentu parlamentár iha lejislatura da-lima nian”, dehan.
Parte seluk, Eis-Deputada Partidu Unidade Nasionál (PUN), Fernanda Borges, nu’udar palestrante, hatete: “Ha’u atu koalia kona-ba prosesu lejislativa komum, hanesan halo lei iha parlamentu, hahú hosi ne’ebé, oinsá lei ne’e tama, sé mak iha poder atu halo lei, oinsá mak lei ne’e prosesa iha parlamentu laran to’o votasaun no haruka ba Prezidente Repúblika atu promulga ka veta polítika eh konstitusionál.
Eis-Deputada ne’e enkoraza ba deputadu foun sira hodi labele laran taridu, tanba ne’e prosesu aprendizajen ida, presiza lé barak no aprende barak, fera ulun, labele moe atu husu deputadu antigu sira ne’ebé sei hakna’ar-án iha parlamentu inklui asesór sira.
“Ha’u hato’o esperiénsia rasik katak bainhira ha’u hetan mandatu atu sai deputada iha parlamentu iha 2007, ha’u mós laran taridu, tanba ha’u nunka lé rejimentu entaun ha’u la hatene, ha’u mai atu halo saida, tur iha ne’e atu foti liman oinsá no vota ba saida, halo oinsá mak vota no oinsá mak ha’u ko’alia”, konta.
Borges hatutan tan: “Ha’u lé barak, estuda barak, fera ulun, husu ba maluk deputadu antigu sira balun, ko’alia mós asesór sira, to’o ikus ha’u mós bele komprende lala’ok funsionamentu parlamentu nian.
Jornalista: Zezito Silva
Editora: Rita Almeida
