Xefe Kaza Sivíl Prezidénsia Repúblika, Francisco Maria de Vasconselhos, bainhira lee komunikadu imprensa hosi Xefe Estadu iha salaun Palásiu Prezidente Nicolau Lobato, Bairru Pité, kuarta ne'e. Foto Xisto Freitas

DILI, (TATOLI) – Prezidente-Repúblika, Francisco Guterres Lú Olo, antes ne’e (21 Juñu 2018), hakerek ona karta ba Primeiru-Ministru (PM) Indijitadu, Taur Matan Ruak, atu tetu didi’ak kandidatu membru Governu balun ne’ebé tama ona iha instánsia judisiál kompetente.

Aleinde ne’e, Prezidente-Repúblika mós fó hanoin ba Primeiru-Ministru liuhusi karta refere atu fó atensaun ba kandidatu membru Governu (la’ós hotu-hotu) ne’ebé involve iha kontrovérsia étika balun.

“Prezidente-Repúblika husu atu konsidera fali no pondera ka tetu razaun tanbasá mantein naran sira ne’e iha lista membru Gavernu Da-Ualu Konstitusionál”, Xefe Estadu hato’o kestaun ne’e liuhusi komunikadu imprensa ne’ebé lee direta hosi Xefe Kaza Sivíl Prezidénsia Repúblika, Francisco Maria de Vasconselhos, iha salaun Palásiu Prezidente Nicolau Lobato, Bairru Pité, kuarta ne’e.

Prezidente-Repúblika hatene katak membru Governu sira iha responsabilidade kriminál no tenke hetan suspensaun hosi serbisu bainhira hetan ona akuzasaun definitiva ba krime ne’ebé bele hetan kastigu liu tinan rua.

“Responsabilidade kriminál hosi membru Governu sira haree momoos ona iha konstituisaun artigu 113 pontu 1, katak membru Governu ne’ebé hetan akuzasaun definitiva (liu tinan 2) tenke hetan kedas suspensaun, nune’e bele tuir prosesu iha Tribunál”, Lú Olo esplika.

Pontu 2 hosi artigu 113, nia esklarese membru Governu sira ne’ebé halo krime ladún grave (kastigu la liu tinan 2), bele hetan mós suspensaun, maibé konstituisaun determina katak Parlamentu Nasionál maka tenke deside membru Governu ne’e hetan suspensaun ka la’e.

“Prezidente-Repúblika iha konsiénsia no hatene saida maka prezunsaun inosénsia, saida maka imunidade no saida maka responsabilidade kriminál”, afirma.

“Prezidente-Repúblika kumpri de’it ninia devér konstitusionál no iha konsiderasaun ba preokupasaun hosi sosiedade sivíl sira”, Xefe Estadu hatutan.

Lú Olo haktuir molok ne’e nu’udar Prezidente husu tuir ba instituisaun relevante hodi buka tuir katak iha ka la’e inkéritu kriminál, akuzasaun definitiva ka kondenasaun judisiál ba individualidade proposta hodi sai membru Governu Da-Ualu Konstitusionál.

Prezidente-Repúblika realsa hikas katak nia la rejeita ema balun iha lista ne’ebé aprezenta hosi Primeiru-Ministru, maibé nia só kumpri de’it kompeténsia Prezidente-Repúblika iha konstituisaun.

Jornalista: Xisto Freitas

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here