Ministra Finansas en ezersísiu, Sara Lobo Brites no Eis Ministru Planu no Finansas, Rui Augusto Gomes. Foto/MF.

DILI, (TATOLI)- Eis Ministru Planu no Finasas, Rui Augusto Gomes, iha serimónia entrega relatóriu ba Ministra Finansas en ezersísiu, Sara Lobo Brites, hatete prioridade Ministériu Finansas (MF) iha Governu Konstitusionál Daualuk mai ne’e mak presiza prepara orsamentu rua mak 2018 nian no Orsamentu Jerál Estadu (OJE) 2019.

Rui dehan preparasaun orsamentu ba 2018 ladún difisil tanba tinan ne’e hela de’it fulan hira nia laran pur tantu presiza halo orsamentu ba tinan ne’e, maibé ba 2019 sei difisil.

“Tanba ita presiza tranzita husi line item budget ba program budgeting entaun kada programa ida ne’e tenke halo nia kusteamentu, nia montante ne’e hira mak atu tau iha kada programa, ida ne’e mak ha’u dehan difisil ne’e”, Rui tenik iha Ministériu Finansas Aitarak-Laran, ohin, hafoin serimónia entrega relatóriu serbisu nian.

Hatutan bainhira halo kusteamentu ne’e tenke implementa, mas implementasaun projetu barak ne’ebé la’o neineik iha país ne’e, tanba ne’e mak tenke kuidadu atu gasta osan. “Di’ak liu ita investe duké gasta”.

Nune’e eis ministru ne’e suspeita katak OJE 2019 ne’e sei boot tebes, mas nia ezekusaun ne’e sei ki’ik.

“Susesu ministru ka ministra finansas maka oinsá nia redús financing gap. Ita-nia financing gap ne’e aas tebes, halo oinsá para ita bele redús ne’e ezersísiu ida ne’ebé difisil tebes. Tanba ne’e mak Ministériu Finansas la’ós de’it selu, mas nia tenke halo konjugasaun oinsá polítika fiskál sira ne’e bele iha nia efeitu iha polítika sosiál nomós oinsá estimula kreximentu ekonómika ida que la’ós kreximentu artifisiál tanba osan iha mak foin krexe osan laiha nian lakrexe, ida ne’e la sustentavel.

Ho buat sira ne’e MF hatene ona no oinsá mak bele tau iha prátika. Nune’e eis ministru husu atu halo serbisu hamutuk no mantein nafatin knaar ne’e ho di’ak.

Rui afirma MF iha responsabilidade prinsipál mak atu halo jestaun ba finansas no patrimóniu Estadu nomós halo knaar liuhusi polítika fiskál nia oinsá bele estimula kreximentu ekonómiku ida sustentavel no inkluzivu nomós koordena, superviziona atividade sira ne’ebé iha setór ekonómiku, bankária oinsá mak konjugasaun ida ne’e mak bele halo moris di’ak sidadaun sira.

Tanba ne’e misaun prinsipál MF mak kondús polítika finanseira Estadu nian no garante utilizasaun rekursu ho efisiente no garante katak Orsamentu Jerál Estadu ne’e bele to’o ba ema hotu iha tempu naruk.

Iha relatóriu ne’ebé entrega ne’e ministru sesante husik hela lista kona-ba dezafiu oioin ne’ebé nasaun ka ministériu ne’e enfrenta no husi ne’e mak lideransa foun buka atu rezolve.

“Durante fulan neen nia laran ne’e ita serbisu ho duodésimál, orsamentu ida que limitadu, mas mesmo assim ita konsege ezekuta ho di’ak até ita-nia ezekusaun ne’e porsentu 65 de’it, signifika katak ita-nia kapasidade atu absorve osan ne’e ki’ik, ida ne’e mak xamada atensaun ba aban-bainrua kuandu atu halo orsamentu karik lalika boot demais”.

Ministra Finansas en ezersísiu, Sara Lobo Brites, agradese ba ministru sesante tanba maski tempu badak no difisil buka atu orienta nafatin.

“Óbstákulu mak ita la’o iha duodésimu no iha limitasaun oioin atubele halo dezenvolvimentu ba ita-nia rai”.

Lee mós :

MF Konsege Alkansa Rezultadu Balun

Jornalista : Maria Auxiliadora

Editor : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here