Prezidente KI Kaer liman ho SEKOMS. Foto TATOLI: Egas Cristovão

DÍLI, (TATOLI)-Primeira vizita ofisiál ne’ebé hala’o husi Sekretáriu Estadu Komunikasaun Sosiál (SEKOMS), Merício Juvinal dos Reis “Akara” ba instituisaun reguladora independente, Konsellu Imprensa (KI), ne’ebé hala’o hahú tuku 09h30, ohin dader ne’e, autoridade másima KI, Virgílio Guterres, hato’o liafuan importante rua hodi hasee.

“Primeiru lori Konsellu Imprensa nia naran, hato’o parabéns ba Sekretáriu Estadu Komunikasaun Sosiál foun, ne’ebé foin tama iha loron hirak liubá, mai ona vizita Konsellu Imprensa i Konsellu Imprensa aproveita vizita ida ne’e atu hato’o parabéns,” dehan prezidente KI, iha edifísiu KI, Kintál-boot-Díli, ohin.

Prezidente KI mós haktuir katak KI informa ba sekretáriu estadu kona-ba saida mak Konsellu Imprensa halo ona durante ninia ezisténsia, durante tinan rua ne’e no saida mak sei sai dezafiu ba Konsellu Imprensa nó mós identifika dezafiu balun.

“Ami kontente tanba sekretáriu estadu ko’alia abertamente atu hametin koordenasaun entre Sekretáriu Estadu komunikasaun Sosiál ho tan konselleiru sira, inklui Konsellu Imprensa. Ida ne’e mak ha’u hanoin konteúdu husi vizita sekretáriu estadu mai,” manifesta prezidente Virgílio Guterres hodi haktuir.

Enkuantu, Sekretáriu Estadu Komunikasaun Sosiál, Merício Juvinal dos Reis “Akara” hateten katak intensaun husi vizita ne’e, tan nu’udar ema foun, ne’ebé lidera pasta Komunikasaun Sosiál nian, antes hala’o kna’ar no hala’o kolaborasaun ho entidade relevante komunikasaun sira nian, importante ba dahuluk, tenke hatudu aan.

“Ita-boot sira hatene (jornalista-red); hanesan ema foun, ita presiza mai uluk iha ne’e para ita serbisu hamutuk, hahú kria komunikasaun ba malu haree saida mak ita kolabora, nesesidade, atu tulun malu, atu instituisaun estadu no governu bele hetan susesu,” realsa sekretáriu estadu Merício “Akara” perante profisionál komunikasaun sosiál sira.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here