Sekretáriu Estadu Merício Juvinal dos Reis “Akara”. Foto TATOLI: Egas Cristovão

DÍLI, (TATOLI)-Sekretáriu Estadu Komunikasaun Sosiál (SEKOMS), iha governasaun konstitusionál da-ualu, lidera husi Sekretáriu Estadu Merício Juvinal dos Reis “Akara” iha interese hakarak uza espasu públiku no uza komunikasaun sosiál, hodi promove debate públiku, nune’e bele hakbesik governasaun ho povu no vise-versa.

“Serbisu iha setór komunikasaun sosiál, ita uza espasu no kna’ar ne’ebé ita iha hodi kontribui. Saida mak ita bele halo? Komunikasaun, oinsa ita buka fonte importante, fonte prinsipál husi ita-nia governu, estadu no ita-nia komunidade, sosiedade; povu, iha nasionál to’o karaik,” informa Sekretáriu Estadu Merício “Akara” ba jornalista sira, iha edifísiu Konsellu Imprensa (KI), Kintál-boot, ohin.

“To’o iha nível suku para sira informadu saida mak estadu nia hakarak, governu nia planu no programa i progresu,” reforsa tan sekretáriu estadu ne’e.

Sekretáriu Estadu Merício “Akara” mós akresenta, iha tempu hanesan estadu no governu bele kontinua rona, intende ita-nia komunidade, sosiedade nia hakarak. Entaun, ita-nia kna’ar mak ida ne’e sai fontes informasaun, sentru informasaun para ita-nia estadu no governante sira bele inspiradu, sira bele halo programa di’ak liu. “Ne’e parte ida ita-nia kontribuisaun, kolaborasaun,” nia subliña.

Governante ne’e esplika, iha kontestu kolaborasaun, hakarak ka lakohi nasaun ne’e ita nian, ita mak na’in, ita mak kolabora. Kolabarasaun ita nian iha kontestu komunikasaun sosiál; kolabora ho media sira, jornalista sira, instituisaun media sira i mós ho sosiedade sívil.

Nune’e mós, intelektuál sira para promove debate, diskusaun entre sosiedade, diferensa ideia sira para ita koko fasilita, para públiku hatene katak matenek barak iha, ideia barak iha, agora ita bele hatene ho razaun ida ne’e mak di’ak liu, razaun ida ne’ebá hein lai, to’o ikus ita bele rezolve duni, ita-nia diferensa ne’e ho maneira pozitivu.

“Iha kontestu ida ne’e, kolaborasaun hodi kria estadu ho públiku ho di’ak para ema bele asesu hotu, hato’o ninia aspirasaun no hanoin,” dehan Sekretáriu Estadu Merício Juvinal dos Reis “Akara”.

Jornalista: Rafy Belo

Editór : Manuel Pinto

 

HAKEREK NO HATÁN

Please enter your comment!
Please enter your name here