Vise-Ministru Dezenvolvimentu Abitasaun, Ordenamentu no Ambiente sesante, Abrão Gabriel Oliveira Santos entrega relatóriu serbisu ba Sekretáriu Estadu Ambiente, Demétrio de Amaral de Carvalho.

DILI, (TATOLI) – Sekretáriu Estadu Ambiente, Demétrio de Amaral de Carvalho, hatete servisu ne’ebé nobre (pekerjaan yang mulia) mak defende direitu ambientál, tanba ne’e labele sente ki’ik.

“Ó-nia liman, ó-nia hanoin la’ós de’it salva ema lubun ida, maibé ó-nia liman, ó-nia hanoin no kosar-been salva mundu”, Demétrio hato’o ne’e iha nia intervensaun ba serimónia entrega relatóriu husi Vise-Ministru Dezenvolvimentu Abitasaun, Ordenamentu no Ambiente sesante, Abrão Gabriel Oliveira Santos, iha Bebora, ohin.

Durante intervensaun nia hatutan luta defende ambiente hanesan aspetu ida importante atu garante dezenvolvimentu ida ne’ebé nabilan liu, ida ne’ebé murak liu ba ema Timor-Leste.

Tanba ne’e liuhusi kooperasaun no hanoin koletivu ida ne’ebé forte liu, ambiente sai unidade ida forsa liu, nune’e loron ruma ema hateke mai ambiente ema foti xapeo, tanba konsege demostra koletividade ida ne’ebé iha kualidade, sai ekipa ida ne’ebé fó susesu ba serbisu, afirma.

“Ho ita-boot (funisonáriu) sira-nia matan, konfiansa, matenek ita bele sai super team ida iha ambiente. Tanba ne’e ita hotu kuidadu iha ita-nia desizaun sira bá oin atu harii koletividade ida ne’ebé metin. Ambiente lori bá oin tenke beran liu, kbiit-wa’in liu, maibé atu to’o ba iha ne’ebá ha’u sura ho ita-boot sira hotu”, katak tan.

Tanba ne’e dezafiu boot liu mak haree oinsá utiliza rekursu umanu uitoan n’ebé iha ho ótimu, másimu atu fó efikásia ba rezultadu serbisu sira ne’ebé sei halo bá oin, realsa.

“Iha parte sosiedade ne’ebé luan liu iha Timor-Leste, ita sei halo aprosimasaun ida diferente atu halo engagement (kompromisu) ba setór privadu sira atu sai ita-nia aliansa, laós ita-nia adversáriu, inimigu, sira bele komprende prosesu atu uza mekanizmu kontrolu sira ne’ebé ita halo, lei no regulamentu sira hanesan sira-nia tools (instrumentu) ba jestaun, sira-nia tools ba dezenvolvimentu sira-nia negósiu no atividade emprezariál”, tenik.

Tanba ne’e, nia akresenta tenke reforsa serbisu ho setór importante ida ne’e no fila pensamentu katak sira mak sai autór ba estraga ambiente, maibé sai fali autór ne’ebé bele haforsa serbisu ba defende meiu-ambiente no ida ne’e knaar ida ne’ebé tenke halo.

Vise-Ministru Dezenvolvimentu Abitasaun, Ordenamentu no Ambiente sesante, Abrão Gabriel Oliveira Santos, sujere ba Sekretáriu Estadu Ambiente, Demétrio de Amaral de Carvalho, atu lori ambinete ne’e sura mós hanesan ho obra públika tanba bainhira iha Timor-Letse lako’alia kona-ba ambiente, lalika ko’alia dezenvolvimentu.

“Se lasura ambiente entaun lalika mehi atu halo buat ne’ebé tuir hakarak. Intensaun importante liu mak hatudu ezisténsia ambiente ne’e importante liu. Hakarak ka lakohi ambiente tenke sura iha rai ida ne’e”.

Jornalista: Maria Auxiliadora

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here