Sekretáriu Estadu Ambiente, Demétrio de Amaral de Carvalho. Foto Facebook/Gabinete SEMA.

DILI, (TATOLI) – Sekretáriu Estadu Ambiente, Demétrio de Amaral de Carvalho, hatete serbisu iha ambiente nian sei hahú ho diagnóstiku ida ba kondisaun internál diresaun jerál, nasionál sira atu hatene didi’ak saida mak halo ona no presiza atu halo.

“Saida maka sai dezafiu no difikuldade durante sira-nia serbisu no karik mós aprende lisaun husi susesu sira ne’ebé iha, fallasu sira ne’ebé iha nafatin haree hanesan lisaun, nune’e dezeña filafali programa ba tinan lima mai no anuál 2018 nian ne’ebé refleta duni kontribuisaun husi pesoál sira ne’ebé durante ne’e serbisu iha meiu ambiente”, Demétrio afirma lia hirak ne’e iha Bebora, ohin.

Tanba ne’e liuhusi diaognóstiku ne’e maka sei fó koñesimentu ida kle’an liu ba atividade ne’ebé halo ona no ida ne’ebé presiza halo di’ak liután no se iha reajustamentu ruma karik diagnóstiku ne’e sei fó kondisaun di’ak liu atu orienta ka reorienta prosesu sira.

Eis deputadu ne’e hatutan Governu iha nia programa kinzenál no tinan lima nian ne’ebé sei lori ba Parlamentu Nasionál atu hetan aprovasaun no iha nia prioridade sira ne’ebé mak iha.

Vise-Ministru Dezenvolvimentu Abitasaun, Ordenamentu no Ambiente sesante, Abrão Gabriel Oliveira Santos, hatete durante nia knaar iha buat lubun mak seidauk halo tanba tempu ne’ebé limitadu tebes no ho orsamentu duodésimu, maibé konsege halo buat balun hanesan buat ne’ebé iha halo metin liután no seidauk halo kompletu liután tanba vizaun ne’e ba Estadu.

“Baze mak Planu Estartéjiku Dezenvolvimentu Nasionál 2011-2030 ne’e iha buat lubuk mak tenke halo no ho fazeadamente tanba situasaun ho fulan sia ne’e ho orsamentu duodésimu ami barak liu mak halo estratéjia oinsá mak halo metin buat sira ne’ebé iha ona”.

Jornalista: Maria Auxiliadora

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here