Foto/Google.

DILI, (TATOLI)- Sekretaria Estadu Polítika Formasaun Profisionál no Empregu (SEPFOPE) , Julião da Silva, hatete iha Timor-Leste nia sidadaun sira maioria mak joven, tanba ne’e, oitavu governu, liu-liu SEPFOPE sei fó prioridade ba sira (juventude) atu asesu ba formasaun hotu.

“Se bele karik formasaun lia-Korea ne’e labele de’it iha Dili, tenke bá (desentraliza) iha postu administrativu, tenke to’o iha suku no aldeia”, Julião hatete iha ámbitu entrega relatóriu iha SEFOPE, Kaikoli, ohin.

Nune’e mós formasaun sira ne’ebé oras ne’e loke iha sentru formasaun Tibar, presiza mós lori ba munisípiu.

“Modelu no kursu ne’ebé hanesan ou se ita iha problema kona-ba orsamentu ita labele to’o iha munisípiu ida-idak bele halo iha rejionál,” nia kalkula hodi fó mós ezemplu katak bele tau sentru formasaun ida  iha Baukau depois joven husi Vikeke no Lautein tuir formasaun iha fatin refere.

“Depois ema hotu tenke asesu tanba ita ko’alia futuru nasaun ita fó prioridade  ba sira tenke asesu formasaun hotu-hotu, labele joven Dili de’it mas joven barak iha baze ne’ebá.”

Iha parte seluk Sekretáriu Estadu Juventude no Traballu (SEJT) sesante, Nívio Leite Magalhães, rekomenda ba SEFOPE atu fó prioridade ba área formasaun profisionál  hodi haree filafali kualidade sentru formasaun no nia fasilidade nomós formadór sira ne’ebé iha.

“Iha parte empregu nian oinsá mak atu halo esforsu tomak hodi bele redús dezempregu nomós programa kriasaun empregu liga ba estratéjia nasionál empregu nian no iha área traballu kontinua inspesaun hodi nune’e bele asegura traballadór sira hetan tratamentu di’ak no dignu”.

Atubele hala’o knaar ho di’ak maka serbisu ekipa importante, nune’e Nívio husu atu funsionáriu sira kontinua fó apoiu ba sekretáriu Estadu foun atubele hala’o serbisu ho di’ak hodi kontribui ba dezenvolvimentu nasionál.

Jornalista : Maria Auxiliadora

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here