Semináriu internasionál. Foto Ajénsia TATOLI: Rafy Belo

DÍLI, (TATOLI)-Organizasaun Naun Governamentál, AJAR (Asian Justice and Rights) hamutuk ho CNC (Sentru Nasionál Chega-Sigla portugés) sai uma na’in ba semináriu internasionál, kona-ba introdusaun no hanorin istória pasada iha estabelesimentu ensinu sira, iha kada nasaun.

Iha seminar ne’e konvida mós edukadór formál no naun-formál husi Guatamala, Kambodia no Kosovo, no seluk tan hodi fahe esperiénsia ba malu kona-ba introdusaun no hanorin istória pasada iha estabelesimentu ensinu sira, iha kada nasaun.

Guatamela nu’udar país ida iha Amérika Sentrál, Kosovo-país eis-Jugoslavia ida. “Workshop ida ne’e, workshop ba dala rua, husi fulan janeiru liubá Timor-Leste mós ba partisipa; edukadór formál reprezenta husi UNTL, UNPAZ. Depois, informál mak husi AcBit, ba partisipa workshop iha Kambodia ne’ebá, sira diskute oinsá fahe esperiénsia kona-ba kada país dezenvolve matéria no métodu oinsa atu hanorin ba jerasaun foun kona-ba istória pasada,” informa diretór AJAR, José Luís Oliveira, ba Ajénsia TATOLI, iha CNC-eis-komarka, Balide-Díli, ohin.

“Agora workshop ida ne’e hodi haree fali esperiénsia kada país nian ne’ebé mak depois workshop iha Kambodia, sira kada país dezenvolve ninia inisiativa. Agora sira mai iha ne’e hodi fahe fali ba malu, atu sira hotu bele aprende ba malu kona-ba esperiénsia hanorin ne’e iha kada país,” reforsa tan diretór José Oliveira.

Diretór AJAR ne’e esplika, uma na’in mak sira, AJAR no CNC; iha interese tanba tuir lei mandatu CNC nian ida mak oinsa ajuda governu atu implementa rekomendasaun CAVR (Komisaun Akollimentu Lialoos no Rekonsiliasaun-sigla iha portugés) sira.

Implementasaun CAVR sira inklui mós kona-ba setór edukasaun no oinsa dezenvolve matéria bazea ba relatóriu Chega, hodi nune’e jerasaun foun bele aprende saida mak akontese iha pasadu nune’e mós bele aprende valór direitu umanu, demokrasia no solidariedade.

Husi CNC halo ona aproximasaun ho Ministériu Edukasaun mas infelizmente tanba tranzisaun governu ne’e mak sira seidauk estabelese kooperasaun ida ne’ebé mak formál oituan tanba seidauk asina Memorandum de Intendimento.

“Agora husi parte ami, husi AJAR, ami durante tinan hirak liu ona, koko ona dezenvolve matéria balun hodi hanorin iha eskola primária. Liliu, relatóriu Chega ne’e ami halo ho versaun populár ne’ebé ema babain interese atu lee. Nia versaun ofisiál ne’e 250 pájina, ne’e boot tebes, susar atu ema babain bele lee,” informa diretór José Luís.

Nia hatutan, versaun populár ne’e mós sira fahe ona ba eskola sira. Durante tinan haat kotuk ne’e, sira mós dezenvolve hamutuk ona ho universidade sira iha Timor-Leste; UNTL (Universidade Nasionál Timor Lorosa’e), UNPAZ (Universidade da Paz), Universidade Orientál Timor Lorosa’e (UNITAL), Institutu Superiór Cristal, no Indonézia; UI (Universitas Indonézia), Universidade Padjajaran, Universitas Brawijaya no seluk tan, atu oinsa dezenvolve relatóriu Chega ne’e sai matéria atu hanorin iha level universidade iha Timor-Leste nomós Indonézia.

“Workshop ida ne’e mós parte ida atu reforsa tan inisativa ne’ebé mak ami halo ona, hodi ita bele aprende husi país sira seluk, hanesan sira dezenvolve matéria sira hodi hanorin iha ne’ebá,” konklui diretór AJAR, José Luís Oliveira.

Antes ne’e, Timor-Leste, reprezenta husi dosente no peskizadór UNTL, Aniceto Guru Berteni Neves, iha loron 15-19 janeiru, iha Phnom Penh, Kambodia.

Entretantu, semináriu ne’e sei hala’o durante loron tolu, hahú ohin no sei termina iha kinta (28/06), ho tipu atividade oioin, tuir oráriu ne’ebé ajendadu ona.

Jornalista: Rafy Belo

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here