Feira artezanatu Ataúru ne'ebé organiza husi Empreza Di'ak.

DILI, (TATOLI) – Empreza Di’ak serbisu hamutuk ho abitante Ataúru hatudu talentu feto maluk illa ne’e nian liuhusi kreatividade ne’ebé mak sira kria liuhusi produtu lokál hodi mostra sira nian kultura.

Kordenadora ba Programa Feto iha Empreza Di’ak, Joana Gusmão, hatete atividade merkadu artezanatu Ataúru ne’e halo atu apoiu rezidente rai ne’e nian hodi lori sira-nia produtu tradisionál ne’ebé kria bá merkadu.

Joana hatutan maski sira hatene halo produsaun, maibé susar asesu ba merkadu entaun organizasaun naun governamentál (ONG) ne’e suporta hodi promove iha Dili no nasaun seluk.

“Iha Timór ema husi estranjeiru barak mak vizita, sira sosa ita-nia produtu. Signifika sira sosa no lori bá sira-nia rai ne’e hanesan parte husi promosaun ba produtu ne’ebé halo”, Joana hatete iha feira artezanatu Ataúru ne’ebé realiza iha sábadu foin lalais ne’e iha Farol, Dili.

Atividade hanesan ne’e Empreza Di’ak koko atu halo kada tinan hodi suporta atu hetan netik osan ruma para sustenta família.

“Maski sira halo produtu maibé sira hela dook husi vila ka área ida ne’ebé susar ba sira atu lori mai merkadu, entaun ami sente merese duni atu suporta”, katak Joana.

Koordenadora ne’e haktuir ninia parte fó kapasitasaun, ajuda hamoris filafali produtu ne’ebé halo ona no asesu ba merkadu.

Joana afirma iha dezafiu barak ne’ebé grupu sira hasoru  mak lori produtu ne’e ho distánsia dook atu fa’an, tanba ne’e ninia parte deside vizita sira-nia fatin kada fulan hodi halo monitorizasaun no sosa produtu nomós buka dalan ba sira.

Liuhusi kooperasaun ne’e Empreza Di’ak halo ona serbisu direta ho feto maluk iha illa ne’e hamutuk 2000 no indireta iha munisípiu sira seluk mak feto vulneravel hamutuk 4000.

“Serbisu ne’ebé ami halo ba sira mak fó kapasitasaun, oinsá sira bele sente maski hasoru violénsia labele para iha ne’e, maibé bele halo atividade ruma  hodi hakbiit sira-nia ekonomia”.

Diretora Empreza Di’ak, Maria Amado, relata empreza ne’e harii iha 2011 objetivu hamenus ki’ak  liuhusi harii oportunidade rendimentu di’ak ba feto no mane nomós hakbiit ekonomia feto liuhusi asesu ba merkadu no dezenvolvimentu ba negósiu ki’ik liuhusi métodu treinamentu ne’ebé inovativu no efetivu.

“Ami haree ba kapasidade no talentu ne’ebé iha ona no aproveita ida ne’e atu harii oportunidade sira ba ema atu moris di’ak liután liuhusi sira-nia serbisu rasik”.

Diretora Jerál Arte no Kultura, Cecilia Assis, hatete liuhusi koñesimentu tradisionál ne’ebé feto maluk Ataúru halo no ho ajuda husi Empreza Di’ak halo kapasitasaun ba sira ne’e di’ak no Governu nia haree pozitivu tebes tanba parte ida atu dezenvolve no prezerva kultura tradisionál.

“Ho sasán sira ne’e bele fó rendimentu ekonómiku ba sira-nia família nomós  iguladade jéneru ba feto maluk iha Timór, ne’ebé Governu sei haree buat sira ne’e”, katak Cecilia.

Jornalista: Maria Auxiliadora

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here