Portavós Ministériu Negósiu Estranjeiru Indonézia, Armanatha Nasir. Foto Espesiál

DILI, (TATOLI) – Prezidente Repúblika, Francisco Guterres Lú Olo, sei halo ninia vizita Estadu dahuluk iha tempu badak no tuir ajenda sei vizita Palásiu Prezidensiál Bogor, Java Oeste kinta (28/6) no sei simu husi Prezidente Repúblika Indonézia, Joko Widodo.

Durante konferénsia imprensa sesta ne’e, portavós Ministériu Negósiu Estranjeiru Indonézia, Armanatha Nasir, haktuir xefe estadu rua ne’e sei ko’alia kona-ba oinsá hametin relasaun bilaterál.

“Timor-Leste hanesan ita nia nasaun viziñu ne’ebé besik husi aspeitu istória, kooperasaun ekonomia nomós relasaun entre ema”, tenik ba jornalista sira.

Tuir nia Indonézia nia haree ba vizita Estadu ne’e hanesan oportunidade atu halo diskusaun kooperasaun potensiál ne’ebé nasaun rua ne’e bele dezenvolve, espesiál iha área infraestrutura, enerjia, finansa, bankária, farmásia no turizmu.

Portavoz ne’e mós akresenta asuntu seluk ne’ebé Indonézia hakarak inklui iha kooperasaun mak impostu, protesaun investimentu no konetividade. “Ita hakarak hasa’e konetividade voo entre Indonézia ho Timor-Leste”.

Nia hatutan, atuál iha empreza estatál Indonéziu nain sia no sentena empreza Indonéziu mak halo hela operasaun iha Timor-Leste ne’ebé investe ona hamutuk tokon US$600 iha projetu 18.

Alende ne’e, nasaun rua kompartilla merkadu ida iha fronteira ne’ebé faan nesesidade bázika ho valor faturamentu ne’ebé konsiderável.

“Indonézia atualmente esplora hela kooperasaun atu kontrui estrada pedájiu iha Timor-Leste, maibé asuntu ne’e seidauk iha detallu”, akresenta Nasir.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here