Primeiru-Ministru, Marí Alkatiri.

DILI, (TATOLI) – Primeiru-Ministru Governu dahituk, Marí Alkatiri, husu ba profesionais Radiu Televizaun Timor-Leste, Empreza Públika (RTTL,EP) atu serbí Estadu no públiku ho profesionál liután.

Marí Alkatiri husik mensajen ne’e durante enkontru ikus ho estrutura Konsellu Administrasaun RTTL,EP molok termina ninia mandatu iha semana ne’e.

ʺGovernu bele muda ida ba governu seluk, maibé Estadu kontinua. Tanba ne’e servidór ne’e Estadu nian hanesan servisu profesionais atu servisu di’ak liután hodi serbí Estaduʺ, dehan PM iha edifísiu ZEESM (Zona Ekonomia Espesiál, Sosial Merkadu) Farol, ohin.

Maske la asume ona kargu iha Governu foun, maibé Alkatiri promete sei kontinua fó apoiu opiniaun no matenek tomak ba RTTL,EP hodi dezenvolve.

ʺRTTL,EP nasionál presiza iha ekipamentu ida di’ak liután  iha Timor-Leste hodi kompete ho televizaun privaduʺ, tenik tan.

Prezidente Konsellu Administrasaun RTTL,EP, Gil da Costa, hateten instituisaun públika ne’e presiza edifisiu foun hodi fasilita servisu funsionáriu atu transmite informasaun ba públiku ho di’ak liután.

ʺEdifísiu RTTL,EP agora la serve ona para funsionáriu sira halo servisuʺ, katak Gil da Costa.

Jornalista: Agapito dos Santos

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here