Enkontru entre Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur ho Prezidente Repúblika, Francisco Guterres Lú Olo. Imajen Mídia Palásiu PR.

DILI (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Lere Anan Timur rekomenda ba Prezidente Repúblika, Francisco Guterres Lú Olo, atu labele nomeia ema sira ne’ebé antes ne’e tama ona iha Tribunál ba  membru VIII Governu tanba kestaun dignidade Estadu.

“Ida ne’e maka ha’u mós husu katak sé maka hola parte iha Governu. Ne’e Ita ko’alia kona-ba estabilidade nasionál. Ha’u hanoin katak sira ne’ebé naran iha ona Tribunál tanba kazu Korupsaun Koluzaun no Nepotizmu (KKN) ne’e ha’u rekomenda ba Prezidente Repúblika lalika fó tomada pose ba sira. Husik sira nia kazu ne’e konsumadu tiha maka foin fó tomada pose ka la fó tomada pose,” Lere hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, relasiona ho membru Oitavu Governu ne’ebé sei simu tomada pose iha 22 Juñu (bainrua).

Tuir nia katak la fó tomada pose ba ema hirak ne’e (akuzadu involve KKN) tanba kestaun dignidade Governu no dignidade Estadu ninian.

“La’ós Primeiru-Ministru lori lista membru Governu mai ita nomea kedas sein haree ba dignidade Estadu nian, ida ne’e labele,” Lere realsa.

Iha biban ne’e, nia hatutan, povu preokupa ba situasaun polítika atuál, tan ne’e, dentru tinan lima ida ne’e, podia importante liu atu prepara jerasaun foun.

“Ita nia rai la’ós liuhusi bandeiza maka fó liberdade no demokrasia, maibé lori timoroan barak fakar nia ran no lakon isin lolon. Tanba ida ne’e maka atu sama ami nia ain fatin, tenke rai ain fatin ida di’ak para jerasaun foun sira bele hakat tuir,” Lere afirma.

Serimónia tomada pose ba membru VIII Governu sei hala’o iha Palásiu Nobre Lahane, bainrua (sesta). Oras ne’e, Komisaun Organizadora prepara hela kondisaun ba serimónia refere.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here