Koordenadór AIFAESA, Abilio Oliveira Sereno. Imajen/Egas Cristovão

DILI, (TATOLI)- Nasaun membru ba Forum Inspesaun Seguransa Alimentár no Atividade Ekonómika (FISAAE) Comunidade dos Países da Língua Portuguesa (CPLP)) iha 19 Juñu 2018 halo inspesaun Konjunta ka asaun konsertada ba otél no restaurante sira iha área tasi-ibun hahú husi tuku sia dadeer tuir nasaun ida-idak nian.

Autoridade Inspesaun no Fiskalizasaun ba Atividade Ekonómika no Sanitária (AIFAESA) hanesan membru forum nó mós vise-prezidente FISAAE CPLP nian ne’ebé eleitu iha novembru 2016 halo ona asaun ne’e hahú husi fatin sira iha Area Branka, Kristu Rei.

Koordenadór AIFAESA, Abílio Oliveira Sereno, hatete prezidente forum ne’ebé lidera husi Autoridade Seguransa Alimentár no Ekonómika (ASAE) iha Portugál, hatún planu ida atu membru sira hotu hala’o asaun ida hamutuk.

“Tuir koordenasaun husi prezidénsia nian ne’e maka AIFAESA halo inspesaun ida ne’e, nia objetivu tuir ami-nia haree mak hatudu ba membru hotu-hotu kapasidade organizasaun ida-idak nian, instrumentu saida mak uza para halo inspesaun ne’e? Rekursu umanu nia kapasidade to’o ona iha ne’ebé para membru hotu-hotu tenke hatene kapasidade ida-idak nian”, Abílio hatete iha Area Branka ohin, bainhira ekipa halo inspesaun.

Abílio afirma liuhusi inspesaun ida ne’e bainhira presiza atu husu tulun ba malu iha área formasaun, sira ne’ebé iha ona koñesimentu kle’an no esperiénsia liu membru seluk hatene ona katak membru ida ne’e presiza treinamentu no ekipamentu ba área hanesan ne’e.

“Ida ne’e mak objetivu asaun konsertada no ami sei kontinua nafatin to’o estabelesimentu ne’ebé iha”.

Rezultadu husi atividade ne’e AIFAESA sei halo relatóriu tuir prosedimentu normál bainhira hetan buat ruma kontra lei sei foti regra ne’ebé iha depois diresaun AIFAESA maka haruka fali rezultadu ba iha prezidénsia FISAAE iha Lizboa.

“Sira mak haree para tetu, kuandu ita presiza ajuda karik ita husu sira hatene ona maizumenus saida mak ita presiza. Ne’ebé rezultadu sira ne’e ami sei haruka relatóriu bá ne’ebá mak sira fahe fali ba membru seluk”.

Iha inspesaun bá restaurante ka estabelesimentu lima iha Area Branka ne’e hetan produtu liu prazu hamutuk 51, bébida hamutuk 31 no alimentár ka hahán 20.

“Ne’e hatudu estabelesimentu sira ne’e komesa kumpre ona, produtu apreendidu ladún no sira mós halo tuir regra ne’ebé impoen iha restaurante”.

Multa ba restaurante sira ne’ebé kontra regra hanesan baibain husi rihun ida to’o sanulu. “Sira ne’ebé sasán estragadu, liu prazu to’o de’it cinco mil”.

Jonalista : Maria Auxiliadora

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here