iklan

NASIONÁL, POLÍTIKA

AIFAESA Rekolla Reseita Rihun 82 Ba Kofre Estadu

AIFAESA Rekolla Reseita Rihun 82 Ba Kofre Estadu

Koordenadór AIFAESA Abílio Oliveira Serano

DILI (TATOLI)-Koordenadór AIFAESA Abílio Oliveira Serano hateten, AIFAESA konsege rekolla reseita rihun 82 ba kofre estadu durante mandatu sétimu governu relasiona aplikasaun multa ba emprezáriu sira ne’ebé loke restaurante nó mós apreensaun tabaku ne’ebé tama illegal iha rai laran.

Enkuantu, iha tinan 2017, instituisaun ne’ebé tutela iha Gabinete Primeiru Ministru ne’e rekolla reseita ba kofre estadu hamutuk rihun 126 resin.

ʺIda ne’e rezultadu hosi ami AIFAESA nia servisu, ʺhateten, Koordenadór AIFAESA ba Jornalista sira hafoin entrega relatóriu servisu ba Primeiru Ministru Mari Alkatiri, iha Palásiu Governu ohin.

Koordenadór ne’e hateten, restaurante 40 maka oras ne’e re-ativa hafoin hadi’a kondisaun infraestrutura, maibé 70 sei kontinua taka tanba seidauk prienxe kritériu.

Tuir Abílio Oliveira Serano durante mandatu governasaun da hitu hetan apoiu tékniku, jestaun no koordenasaun di’ak, maibé enfrenta problema orsamentu tanba orsamentu hetan de’it rihun 33 ne’ebé ezekuta ba saláriu funsionáriu 67.

Iha sorumutu ne’e, Primeiru Ministru, Mari Alkatiri nafatin enkoraja funsionáriu AIFAESA nian atu kontinua servisu ho Governu foun. ʺ Primeiru ministru husu hanesan funsionariu profesionais tenke kumpre nafatin devér professional la’ós de’it ho governu atuál maibé kualkér governu no entidade tutela ne’ebé de’it,ʺ dehan Nia.

Entretantu, instituisaun ne’e sei enfrenta problema rekursu umanus, falta laboratóriu hodi halo teste ba sasán importasaun ne’ebé deskonfia liu prazu.

Jornalista: Agapito dos Santos

Editór : Manuel Pinto

 

iklan
iklan

Leave a Reply

iklan
error: Content is protected !!