Ilustrasaun

SUAI, (TATOLI)-Kontijente Pacific Angel ne’ebé fó asisténsia médika ba komunidade iha Suai, identifika no rejista katak moras kulit no infesaun vias respiratóriu mak aas liu iha Munisípiu Kovalima.

“Horseik (kuarta) ami simu pasiente atus hitu resin. Moras barak liu mak moras kulit no infesaun vias respiratória”, haktuir major Jeremy Raab, nu’udar dotór medisina fízika família, ba jornalista sira iha eskola públika nú.01 Seran Kote, Suai Vila, sesta ne’e.

“Ami sei oferese tratamentu ba Suai oan sira durante loron ne’en (husi 11-16 juñu),” informa tan major Jeremy, Forsa Áerea Estadu Unidu Amérika (EUA) ne’e.

 Enkuantu, xefe departementu jestaun no parseria, Ministériu Saúde (MS), Ivo Ireneu da Conceição Freitas konfirma katak hahú husi loron primeiru ba implementasaun asisténsia médika, númeru komunidade ne’ebé mai halo konsulta husi loron ba loron aumenta ba bebeik.

“Husi Dia onze, fofoun pasiente 499, loron segundu 750, loron terseiru iha pasiente 1007. Komunidade entuziasmu tebes, loron tolu de’it hamutuk 2.256; ohin (kinta), aban no bainrua ami seidauk bele hato’o,” akresenta xefe departamentu Ivo Ireneu, iha nia entrevista ho jornalista sira.

Nia relata, tuir planu ne’ebé mak Kontijente Pacific Angel fó sai katak sei fó asisténsia médika loron ida. halo de’it atendimentu no tratamentu ba pasiente na’in 500. Ikus, realidade hatudu oinseluk tanba komunidade entuziasmu tebes.

“Maibé iha realidade komunidade iha vontade tebes, entuziasmu tebes; balun husi Fatumea, balun husi Fohorem, husi Fatululik, komunidade tuun hotu mai, maske sira selu ojek karun. Sira haree katak ekipa ne’e iha ne’e, sira mai halo konsulta ka tratamentu,” haktuir xefe departmentu jestaun no parseria, Ivo Ireneu da Conceição Freitas.

Xefe ne’e reforsa, husi komunidade ne’ebé halo tratamentu saúde husi Kontijente Pacific Angel, ho apoiu husi médiku husi FALINTIL-FDTL (Forsa Defeza Timor-Leste), profisionál saúde munisípiu Covalima, bazea ba dadus ne’ebé iha, moras respiratóriu mak barak.

“Moras ne’ebé barak liu, infeksaun doensa respiratóriu depois moras kulit mós, maibé nehan mós loron ida kuaze atus resin, nune’e mós matan ninian loron ida bele hetan atus rua resin,” klarifika pontu fokál Pacific Angel 2018 husi MS ne’e.

Xefe departementu jestaun no parseria, Ivo Ireneu da Conceição Freitas akresenta mós katak ho identifikasaun no tratamentu ba moras sira ne’ebé mak iha, Ministériu Saúde espera katak bele muda estatutu saúde komunidade nian, liliu komunidade iha Munisípiu Covalima.

“Ha’u hanoin katak iha relasaun ne’ebé di’ak tebes, ita-nia profisionál saúde sira serbisu hamutuk ho ita-nia ekipa ne’ebé mai husi misaun ekipa Pacific Angel ninian; médiku sira husi F-FDTL, nune’e mós médiku sira husi ospitál referál, médiku sira husi sentru saúde Covalima ninian nomós voluntáriu sira (CVTL) serbisu kapas tebes, nune’e mós ita-nia tradutór sira, profesór sira nomós ONG sira ne’ebé serbisu suporta saúde,” nia haklaken.

Entretantu, koordenasaun Pacific Angel hahú ona iha dezembru 2017 ho MS nomós Ministériu Defeza no Seguransa (MDS) ho Ministériu Negósiu Estranjeiru no Kooperasaun (MNEK). Tuir mai hahú iha marsu, pois maiu 2018 no atividade sira implementa iha juñu 2018, dadaun ne’e.

Atividade sira ne’e fahe ba oin tolu; renovasaun ba fasilidade sira hanesan Sentru Saúde Salele, Postu Saúde As ain, ospitál referral Suai, Polo, nune’e mós eskola sekundária públika nú. 01 Seran Kote, Eskola Primária Mata Air nomós eskola primária katólika Dailo, besik aeroportu Suai, inklui treinamentu ba profisionál saúde sira.

Jornalista: Rafy Belo

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here