Hercules C-130 soe tuun ka airdrop fós tonelada 650. Foto TATOLI: Rafy Belo

SUAI, (TATOLI)-Aviaun funu Amérika ho tipu Hercules C-130, maizmenus tuku 9h30 soe tuun ka airdrop fós tonelada 650, husi kalohan leten tuun mai rai, hodi oferese ba komunidade Suai, postu administrativu Suai vila, munisípiu Kovalima, liliu orfanatu Salele, iha ámbitu operasaun asisténsia umanitária.

“Fós sira ne’e ami sei fornese ba orfanatu sira, orfanatu Salele” informa ofisiál mobilidade áerea, major Erik Lane, ba jornalista sira, iha Suai, sesta ne’e.

Programa fornese fós ba orfanatu Salele, nu’udar parte ida programa saúde jerál, dentária (nehan), oftamolojia (matan), pediátriku no enjeñaria (konstrusaun no rehabilitasaun ba eskola no klínika) ba komunidade sira iha Suai.

“Estadu Unidu, koordena ho ami-nia parseiru timoroan no australianu sira, dezenvolve kooperasaun Pacific Angel hodi ajuda nesesidade povu Timor-Leste nian,” dehan Embaixadora EUA ba Timor-Leste, Kathleen M. Fitzpatrick, antes ne’e.

“Hanesan belun no parseiru sira, ami iha atensaun ho progresu kontinua nasaun boot ida ne’e nian no ami sente satisfeitu tanba ita-nia kolaborasaun bele oferese serbisu sira ne’e,” nia reforsa.

Pacific Angel hanesan parte ida husi kooperasaun ne’ebé la’o dadaun entre EUA no Timor-Leste hodi hadi’a timoroan sira-nia moris no dezenvolve kapasidade autoridade lokál sira no forsa seguransa sira nian.

Pacific Angel nia misaun hafoin Timor-Leste, nia operasaun sira sei hala’o mós iha Vanuatu, Vietname no Sri Lanka. Iha Timor-Leste, Pacific Angel nia atividade sei remata iha 16 juñu 2018.

Jornalista: Rafy Belo

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here