Ministru Defeza no Seguransa, SOMOCHO tuur ho Maiór Jenerál F/FDTL, Lere Anan Timur no Komandante PNTL, Julio Hornay

DILI (TATOLI)—Ministru defeza no seguransa, Agostinho Sequeira Somocho, ohin, hala’o sorumutu hodi despedida ho superior Polisia Nasionál Timor Leste (PNTL) no FALINTIL-FDTL antes termina mandatu iha tempu badak. Enkuantu Jenerál apresia ho servisu Somocho nian.

“Ha’u hakarak despedida espesiál ida ba ofisiais PNTL hosi komandante too inspetór Xefe, enkuantu parte militár hosi Kapitaun too Jenerál,“ Somocho informa iha kuartél jerál Fatuhada, ohin.

Nia dehan durante mandatu hetan apoiu hosi instituisaun PNTL ho F/FDTL hodi garante pás no estabilidade iha eleisaun antisipada too ohin.

Nune’e nia husu instituisaun defeza no seguransa F/FDTL ho PNTL kontinua servisu hamutuk hodi fó apoiu ba ministru foun iha governasaun da ualu. Ho apoiu hirak ne’e mak bele garante estabilidade hodi dezenvolve rai Timor.

Ba superior instituisaun F/FDTL no PNTL, husu atu serbisu ho responsabilidade, profisionál, imparsialidade tuir lei no konstituisaun RDTL.

Enkuantu sujere ba ministru foun atu hadi’a kondisaun forsa rua hanesan uniforme, infraestrutura no seluk tan hodi asegura fronteira Marítima no kadoras mina rai.

Iha fatin hanesan Xefe Estado Maiór F/FDTL, Major Jenerál, Lere Anan Timor hateten, ministru sesante hetan susesu rua durante ninia mandatu maka promosaun ba forsa veteranus na’in haat ba Brigadeiru no estabelesimentu komponente Aero iha instituisaun Forsa.

“Buat rua nee ami la haluha no hakerek iha istória,” Lere apresia.

Jornalista:Agapito dos Santos

Editór : Manuel Pinto

HAKEREK NO HATÁN

Please enter your comment!
Please enter your name here