Ekipa KNK-HIV/SIDA hasoru malu ho Primeiru-Ministru, Marí Alkatiri. Foto/GPM.

DILI, (TATOLI) – Diretór Ezekutivu Komisaun Nasionál Kombate (KNK)-HIV/SIDA, Daniel Marçal, hatete problema HIV/SIDA hanesan kestaun nasionál nune’e presiza partisipasaun ema hotu nian.

Daniel haktuir maski iha dezafiu barak atu kombate hahalok ema nian iha relasaun ho vida seksuál, maibé sei lahamate espíritu komisaun nian atu koa’lia no luta nafatin.

“Problema HIV/SIDA la’ós grupu ida ka rua nia, ne’e problema nasionál ne’ebé presiza partisipasaun ema hotu nian, laharee ba kór mutin ka metan, inklui mós maluk sira husi mídia, ne’ebé imi-nia kolaborasaun, papél importante tebes oinsá ita hamutuk atu redús, kombate ponte sira ne’ebé mak oras ne’e sai oportunidade ba tranzmisaun HIV iha rai-laran”, Daniel katak hafoin hasoru malu ho Primeiru-Ministru, Marí Alkatiri, iha Palásiu Governu, ohin.

Daniel hatutan atu kombate hahalok ne’e presiza ko’alia beibeik liuliu inan-aman sira-nia knaar atu eduka oan sira ne’e importante tebes.

“Ko’alia kona-ba hapara ka rezolve problema HIV/SIDA la’ós buat ida fasil hanesan problema sira seluk. Dezafiu ida mak ne’e, ita atu konvense ema hodi muda hahalok ne’e la’ós buat ida fasil, maibé lahapara ita-nia espíritu atu ko’alia beibeik”.

Iha sorumutuk ho xefe Governu ne’e, KNK-HIV/SIDA hato’o relatóriu no rona ideia balun husi xefe ezekutivu ne’ebé iha esperiénsia boot tebes sobre asuntu iha rai-laran para hamutuk nafatin ho populasaun liuliu governasaun foun mai ne’e bele hamutuk nafatin bá oin hodi rezolve ka buka solusaun ba problema nasionál ida ne’e.

Ideia ne’ebé PM hato’o katak labele dezanima, luta nafatin no serbisu hamutuk ho entidade hotu tanba kestaun HIV/SIDA la’ós problema polítika, maibé interese nasaun nian.

“Primeiru-Ministru fó hanoin liuliu ba joven sira ne’ebé moris iha risku no nasaun presiza sira tanba ne’e tenke kuidadu sira-nia aan tanba sira mak sai kontinuadór, motivadór ba progresu nasaun nian bá oin. Se sira moris lakuidadu aan depois ikus mai kona HIV, depois kaben sedu tiha, laiha responsabilidade, laiha kbiit atu eduka oan entaun ita kontinua nafatin hela ho hahalok sira ne’ebé oras ne’e ita balun halo daudaun bá oin”.

Kona-ba númeru HIV/SIDA iha Timor-Leste tuir dadus Ministériu Saúde nian iha tinan 2017 hamutuk 725.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here