Prezidente Parlamentu Nasionál, Arão Noe de Jesus Amaral. Imajen/Espesiál.

DILI, (TATOLI) – Xefe Bankda Kongresu Nasionál Rekonstrusaun Timor (CNRT-sigla portugés), Arão Noe, deklara katak semana ne’e nia laran Aliansa Mudansa ba Progresu (AMP) sei fó sai lista membru governu da-ualu.

“Sesta-feira ne’e naran hirak ne’e bele sai ona no semana oin mai tan membru governu sira bele hetan ona tomada posse”, Arão ba jornalista sira iha Parlamentu Nasionál, ohin.

Deputadu ne’e hatutan katak lista membru governu kompletu ona, maibé hein tempu de’it atu fó sai, enkuantu Programa, Orsamentu Jerál Estadu (OJE) mós preparadu hotu ona.

Sistema parlamentár mak hahoris governu, tanba ne’e, bainrua tomada posse, depois eleisaun Prezidente Parlamentu no membru meza hotu hafoin lider AMP indijita Primeiru- Ministru hodi aprezenta ba Prezidente Repúblika, Francisco Guterres Lú Olo.

Kuandu halo ona tomada posse ba membru governu hotu hafoin programa tama kedas, lei orgániku no OJE.

Tanba ne’e, atu públika lista membru governu nian presiza hein tempu, la’os naran divulga, bainrua plenária hafoin ne’e mak ami bele fó sai, katak Arão.

“Ita labele fó sai naran antes tanba ema aproveita insulta ema, trata malu tanba ho ábitu aat hirak ne’e”, afirma.

Enkuantu, númeru membru governu: “Ha’u labele hateten tanba bele tun no bele sa’e. Públiku nia konotasaun dehan membru governu iha 42 maibé AMP rasik seidauk deklara kona-ba númeru”.

Entretantu, sistema governu agora sentrálizadu ka sasan hotu sentráliza iha nasionál, se membru governu kiik liu, kargu xefia ka diretór sira depende liu ba desizaun polítika, entaun dependénsia barak liu.

“Ha’u la konkorda redusaun governu ne’ebé menus liu, até balun ko’alia dehan 20 ka liu. Ne’e nia impaktu sei boot tebes ba dezenvolvimentu rai ne’e tanba desizaun hotu agora sei iha nivél sentrál”.

“Ha’u la’os dehan governu ida tenke boot maibé estrutura ida tenke razoavél hodi atende ba preokupasuan sira no dezenvolve rai ne’e lais”, realsa.

Maibé ba  futuru dezentralizasaun la’o ona, governu sentrál nia poder sentraliza ona governu lokál iha munisípiu, entaun bele reduz númeru governu sentrál maibé agora seidauk to’o tempu atu reduz, argumenta.

Jornalista: Zezito Silva

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here