DILI (TATOLI)-Vise-prezidente Institutu Camões-IP, Gonçalo Nuno Teles Gomes hateten, Portugal sei nafatin iha Timor-Leste nia sorin, tanba ne’e sei nafatin dinamiza kooperasaun ho Timor-Leste, hodi kontinua presta apoiu, iha área prioridade sira.

“Tinan ida ne’e sei hahú programa kooperasaun foun, ne’ebé sei marka períodu  tinan lima ninian,” informa vise Gonçalos Teles, iha Timor Plaza-Díli, sábadu ne’e, bainhira halo intervensaun kona-ba loron Portugal ninian.

Vise ne’e akresenta tan katak Instituto Camões, husi Portugal, la’ós de’it hala’o programa iha língua no kultura maibé mós kooperasaun. Nune’e, nia relata katak dezde Timor-Leste independénsia, Institutu Camões aprezenta ona osan euro, millaun 600 resin, inklui seluk tan hodi apoiu Timor-Leste.

Kooperasaun ne’ebé Institutu Camões-IP, Portugal dezenvolve ona iha mundu, inklui Timor-Leste hamutuk atividade 1198, kompostu husi Áfrika 358, Ázia no Oseánia 106, Amérika 152, Eropa 541, Médiu Oriente no Magreb 41.

“Última kooperasaun mak 2014-2017, ezekusaun liu euro rihun 32, ajuda husi Portugal ba dezenvolvimentu Timor-Leste; hatudu ami-nia esforsu, ami-nia empeñu hodi iha Timor-Leste nia sorin,” dehan vise-prezidente Institutu Camões-IP.

“Dezde agrikultura, defeza, justisa, administrasaun interna, saúde, edukasaun. Programa ne’e variadu no luan tebes, ami bele implementa ho susesu, parseria ho governu Timorese,” reforsa tan vise Gonçalo Nuno Teles Gomes.

Atividade no programa ne’ebé dezenvolve husi Camões, apoiu no hamutuk mós ho GIZ-Kooperasaun Internasionál husi Alemaña (sigla iha alemaun) no União Europeia (UE).

Jornalista: Rafy Belo

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here