Prezidente Tribunál Rekursu, Deolindo dos Santos

DILI, (TATOLI) – Prezidente Tribunál Rekursu, Deolindo dos Santos, hateten rezultadu eleisaun antesipada ne’ebé Tribunál Rekursu (TR) deklara maka Koligasaun Aliansa Mudansa ba Progresu (AMP) hanesan vensedór (mais votadu), FRETILIN segundu lugár, Partidu Demokrátiku (PD) terseiru lugár no koligasaun Frente Dezenvolvimentu Demokrátiku (FDD) kuartu lugár.

Tanba ne’e, nia realsa agora akontese selseluk ne’e (liu-liu koligasaun AMP fahe bankada iha Parlamentu Nasionál), Tribunál seidauk iha koiñesimentu formalmente kona-ba kestaun refere.

“Saida maka Tribunál haree katak sira (AMP) lori lista ba Tribunál Rekursu atu kompete iha eleisaun antesipada ho koligasaun ida ne’ebé hanaran Aliansa Mudansa ba Progresu (AMP). Bainhira eleisaun hotu tiha no avansa ba Parlamentu Nasionál ne’ebé sei akontese iha tempu badak, ne’e desizaun ida ne’ebé sira halo iha koligasaun nia laran iha PN.

“Simplesmente, ha’u labele hateten katak viola konstituisaun ka viola lei, tanba ne’e hanesan kestaun ida ne’ebé Tribunál presiza rezerva”, Deolindo hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, segunda ne’e, relasiona ho koligasaun AMP fahe bankada ba tolu iha PN.

Maske nune’e, nia hatutan to’o ohin loron seidauk iha prosesu ruma kona-ba AMP fahe bankada iha Parlamentu Nasionál (PN) ba Tribunál Rekursu.

“Agora ne’e desizaun iha partidu sira ne’ebé hetan kadeira iha PN nomós kabe ba Prezidente Repúblika atu haree kestaun ida ne’e”. Deolindo informa.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here