DILI, (TATOLI)-Reprezentante Téknika OMK (Organizasaun Mundiál Komérsiu), Timor-Leste (TL) ninian, Maria Martins da Silva, informa katak Timor-Leste sai membru observadór ba OMK (WTO-sigla inglés), iha dezembru 2016, to’o agora, nasaun membru OMK submete perguntas adezaun ninian mai TL atu resposta, hodi bele sai membru OMK. Oras ne’e dadaun TL sei observadór.

“Agora dadaun etapa tuir mai mak ita haruka resposta hirak ba membru sira hodi halo revizaun, hodi komesa ona ema bolu working part meeting, membru ne’ebé interese ba ita-nia prosesu adezaun ninian sei husu pergunta mai ita i depois ida ne’e, ita sei resposta tuir, bazea ba prosesu negosiasaun multilaterál WTO ninian i ita mós sei hahú ita-nia bilaterál iha futuru,” informa téknika OMK, Maria Martins ba jornalista sira iha Ministériu Negósiu Estranjeiru no Kooperasaun (MNEK), Praia dos Coqueiros, ohin.

“Hanesan etapa tuir mai, liuhusi ita-nia negosiasaun bilaterál ninian katak entre ita ho membru idaidak ko’alia kona-ba ita-nia tarif, iha goods and service (bens no servisu) tenke tuur hamutuk ho membru sira, iha ne’ebá hodi ko’alia i mós hatudu kona-ba prosesu adezaun, sira ne’ebé mak selesaun kumpleta ona sira-nia prosesu, iha ne’ebé totál 36, i ami fó ami-nia rekomendasaun mós iha servisu tékniku nian”, esklarese téknina OMK, Maria Martins da Silva.

Reprezentante Téknika OMK, Maria Martins da Silva, rekuñese katak ita hanesan nasaun ne’ebé foin dezenvolve, ita iha dezafiu, iha prosesu adezasaun atu sai membru, liliu iha kapasidade téknika nomós oinsa identifika, hodi bele iha benefísiu ba ita.

“Hodi suporta ita-nia setór privadu sira nomós ba ita-nia povu sira, ita bele identifika oinsa prosesu adezaun ba WTO, sei difisil ba ita-nia maluk sira ne’e nomós maizmenus treinu hasa’e ita-nia kapasidade rasik kona-ba WTO ne’e rasik”, realsa.

Nia esplika pesoalmente iha espetativa no hakarak atu prosesu adezaun Timor-Leste hodi sai membru definitivu OMK nian ne’e bele fó benefísiu ba povu Timor-Leste tomak.

“Ami sei esforsa maka’as oinsá haree ita-nia poténsia iha trade (troka) sei hetan bainhira sai membru WTO. Ami espera katak bainhira ita sei membru ita sei hetan benefísiu ne’ebé boot liutan, liuhusi List Development Country-nasaun ne’ebé sei dezenvolve hela iha mundu ne’e”, garante ekonomista Maria Martins da Silva.

Antes ne’e, Koordenadora Reforma Fiskál, Ministériu Planu no Finansa, Fernanda Borges hateten importante ba Timor-Leste oinsa ita tama ba OMK, oinsa adezaun ba ASEAN (Association of South East Asean Nation) ba aban bainrua i oinsa mak prosesu ne’e sei la’o i oinsa ita bele hetan benefísiu ba Timor-Leste, bainhira ita sai ona membru.

“Importante timoroan hotu tanba ne’e la’ós de’it governu mak bele halo maibé parte barak hanesan ita-nia institusaun públika hotu, ita-nia instituisaun privada, emprezáriu ONG sira no povu tomak ne’ebé sei hetan benefísiu husi prosesu ida ne’e,” dehan koordenadora reforma fiskál, Ministériu Planu no Finansa, Fernanda Borges.

Koordenora reforma fiskál ne’e akresenta tan katak bainhira Timor-Leste sai membru OMK importante liu maka protesaun. Nu’udar nasaun ki’ik ida, ita-nia kbiit ekonómiku, relativamente ba nasaun boot sira bainhira sira importa ka esporta sasan ki’ik tanba ita rai ki’ik, illa ida ki’ik.

Ne’e duni bainhira ita sai membru ba WTO, ita tama ona iha instituisaun multilaterál, internasionál, ne’ebé iha regra ba nasaun hothotu. Entaun, Timor-Leste bele ki’ik, ita mós iha direitu ne’ebé tuir regra WTO hakerek ona, ne’ebé membru hothotu tenke tuir.

“Ne’e duni, ha’u hanoin ba ita, importante protesaun ba ita nu’udar membru. Ba oin, Timor-Leste presiza analiza oinsa ita halo prosesu ne’e la’o ho didi’ak atu haree ita-nia estrutura, haree ba ita-nia rekursu naturais ne’ebe ita iha, halo nusa bele halo dezenvolvimentu ida di’ak ho protesaun ne’ebé susesu maibé la limita ita,” nia esplika.

Koordenadora Fernanda Borges hateten, importante mak ita atu hatene sá regra mak ita atu tuir para prepara aan. Ita atu sai membru, ita pozitivu, ita agora membru observadór ona, atu sai membru definitivu, ita tenke prepara ita-nia instituisaun atu bele implementa regra, prepara ita-nia kuadru jurídiku atu iha lei nasionál ne’ebé atu bele refleta enkuadramentu internasionál jurídiku.

“Ita mós presiza kapasita ita-nia rekursu umanu, ita mós tenke iha setór publiku maibé mós setór privadu sira, NGO mós sira mós presiza hatene sá benefísiu mak WTO bele lori mai i saida mak ita tenke halo katak ita-nia nasaun bele forte husi prosesu ne’e,” nia konklui.

Entretantu, nasaun membru OMK, mai husi kontinente Áfrika, Amérika, Eropa, Austrália, Ázia, inklui illa Pásifiku balun.

Jornalista: Rafy Belo

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here