Prezidente Repúblika, Francisco Guterres Lú Olo, dadalia ho jornalista sira iha edifísiu Diresaun Nasionál Rejistu no Notariadu, Bebora, Dili. Imajen Mídia PR.

DILI (TATOLI)—Prezidente Repúblika, Francisco Guterres Lú Olo, deklara nia sei haree tuir sé-sé maka tama iha lista Oitavu Governu ne’ebé aprezenta hosi primeiru-ministru emposadu.

 “Portantu, Prezidente Repúblika nomeia primeiru-ministru depois primeiru-ministru sei aprezenta mós lista kona-ba membru Governu. Iha ne’e, Prezidente Repúblika sei haree bazeia ba Konstituisaun katak membru Governu ema na’in hira no sé-sé maka tama. Hafoin haree ida ne’e loos ona, sei hakat liu-ba tomada pose,” Xefe Estadu hato’o kestaun ne’e ba jornalista sira iha edifísiu Diresaun Nasionál Rejistu no Notariadu, Bebora, Dili, tersa ne’e, relasiona ho prosesu formasaun Oitavu Governu.

“Ha’u labele adianta dún ema dehan ema ida ne’e komete ona krime. Bainhira lista ne’e aprezenta ona ba Prezidente Repúblika maka ha’u sei haree,” Lú Olo hatutan.

Nia dehan Prezidente Repúblika seidauk impoin buat ida ba partidu koligasaun ne’ebé sai vensedór iha eleisaun antesipada, maibé Prezidente Repúblika simplesmente kumpri de’it nia kna’ar tuir Konstituisaun katak Prezidente Repúblika maka sei nomeia Primeiru Ministru ne’ebé maka indizita hosi partidu mais votadu.

Lú Olo afirma AMP fahe ba bankada tolu ne’e kestaun líder AMP nian maibé tuir nia hatene maka AMP rejistadu iha Tribunál nu’udar aliansa partidu no bainhira rezultadu fó sai mós Tribunál hateten katak AMP maka manán, ne’e duni, nia husu atu bainhira indizita primeiru-ministru ne’e tenke mai hosi AMP.

Jornalista: Xisto Freitas

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here