Lú Olo Renova Pasaporte Manuál Ba Dijitál

DILI (TATOLI)—Prezidente Repúblika, Francisco Guterres Lú Olo, renova nia pasaporte manuál ba pasaporte dijitál (eletróniku) iha Diresaun Nasionál Rejistu no Notariadu, Bebora, Dili, tersa ne’e.

Xefe Estadu haree katak kualidade pasaporte Dijitál ne’e di’ak tebes tanba uza sistema metric ka teknolojia ás, tan ne’e, fasilitadór sira hotu iha kualker aeruportu internasionál rekoñese.

 “Pasaporte eletróniku ne’e la hanesan ona ho pasaporte manuál tanba pasaporte manuál ne’e dalaruma ema nia mákina sira iha aeruportu internasionál la deteta. Ne’e problema ida maibé ha’u sente ho ida ne’e bele responde ona,” Lú Olo haktuir.

Prezidente Repúblika hatutan sistema atendementu pasaporte mós la’o di’ak teb-tebes tanba kria ona espasu di’ak ba ema hotu hodi evita insatisfasaun.

Aleinde ne’e, espoza Prezidente Repúblika, Cidália Nobre Guterres mós troka ninia pasaporte manuál ba dijitál. Prezidente Repúblika to’o iha Diresaun Nasionál Rejistu no Notariadu, tuku 10:00-10:25 Otl. 

Jornalista: Xisto Freitas

Editór : Manuel Pinto