Primeiru-Ministru, Marí Alkatiri. Foto GPM

DILI (TATOLI)Sekretáriu Jerál FRETILIN, Marí Alkatiri hateten nia triste tebes tanba Oitavu Governu seidauk harii (forma).

“Serbisu ida hein ne’e ladún di’ak. Entaun sira (Oitavu Governu) ne’e mai lalais ona para halo ha’u kontente oi tuan,” Marí Alkatiri deklara kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, hafoin hala’o enkontru ho Prezidente Repúblika, Francisco Guterres Lú Olo, kona-ba FRETILIN nia pozisaun hanesan partidu opozisaun iha Parlamentu Nasionál.

Nia esplika katak formasaun Governu tarde fó impaktu ba ekonomia ne’ebé liga ba povu nia vida nó mós fó impaktu polítika.

“Ha’u fó korajen ba sira (Governu AMP) para mai lalais ba. Uluk kuandu ha’u demora sira dehan ha’u inkapasidade. Entaun ha’u hakarak sira la’o lalais tanba sira iha kapasidade,” nia tenik.

Kona-ba pozisaun FRETILIN, Marí hatán, FRETILIN prontu ba opozisaun tanba bazeia ba rezolusaun ne’ebé Komité Sentrál FRETILIN (CCF-sigla portugés) hasai ona iha semana kotuk.

“Opozisaun ho sentidu Estadu. La’ós halo revolusaun atu hatún Governu. Opozisaun ne’e parte ida atu fó kontribuisaun konstrutiva ba Estadu,” Marí afirma.

Entretantu oitavu governu sei forma hosi koligasaun Aliansa Mudansa ba Progresu (AMP) tanba AMP mak sai vensedor  iha Eleisaun Antisipada Parlamentár foin lalais ne’e.

Jornalista: Xisto Freitas

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here