Primeiru-Ministru Taur Matan Ruak, enkontru ho Prezidente Repúblika, Francisco Guterres Lú Olo, iha Palásiu Prezidensiál, Bairru-Pite, Dili. Imajen/ Antonio Goncalves

DILI (TATOLI)—Lideransa Koligasaun Aliansa Mudansa ba Progresu (AMP), ohin, Segunda (04/06) sei hasoru malu ho Prezidente da Repúblika (PR), Francisco Guterres Lú Olo, iha Palásiu Prezidensiál, Bairru-Pité.

Enkontru entre Lider AMP ho PR Lu Olo, tuir ajenda hosi lideransa AMP nian, enkontru sei realiza iha tuku 8:30 to’o ramata.

Eis-Sekretáriu Estadu Juventude Desportu, Leovigildo Hornay, dehan ; PR Lú Olo tenke hatete buat ruma ba lideransa AMP sira. Importante liu, PR tene husu ba koligasaun AMP atu realiza promesa eleitorál ne’ebé durante fulan ida resin promete iha kampaíña.

Aleinde ida ne’e, PR tenke fó hanoin ba koligasaun AMP hodi kontinua konsentra ba dezenvolvimentu iha Timor-Leste, maibé dezenvolvimentu ida ne’ebé hanesan ba ema hotu.

“Dezenvolvimentu tenke iha pemerataan (Iguldade-red), atu asegura ida ne’e. Prezidente Repúblika tenke dehan ba lideransa AMP katak,  ema ne’ebé sai membru governu, ema tenke di’ak.”

Hatán kona-bá entre Lider AMP, Kay Rala Xanana Gusmão ho Taur Matan Ruak, se mak sei asume pasta Primeiru Ministru, Leovigildo dehan; Taur Matan Ruak (Prezidente Partidu Libertasaun Polupar-PLP).

“Ha’u hanoin sira na’in rua (Xanana-Taur) nia kapasidade la kestiona. Agora kestaun Primeiru Ministru, Ha’u hanoin, ema kualidade hanesan Taur Matan Ruak pertenente,” Leovigildo observa.

Tuir nia, Taur Matan Ruak, ema ida onestu, no rigor. Tanba ne’e, nia espera ministru ou membru governu sira ne’ebé mak sei ajuda Primeiru Ministru tenke mai figura ida ne’ebé iha integridade no kapasidade jestaun.

Eis-Sekretáriu Estadu Juventude no Desportu, Leovigildo Hornai

“Espera katak Primeiru Ministru, Taur Matan Ruak sei orienta nia membru governu tuir Planu Estratéjiku Dezenvolvimentu Nasionál, plata forma AMP, no rezultadu vizita suku ne’ebé antes ne’e Taur Matan Ruak halo kapasidade nu’udar Prezidente Repúblika.”

Importante liu, Nia subliña, koligasaun AMP iha lejitimidade no autoridade atu forma governu, tanba ne’e ho lejitimidade ne’ebé mak iha koligasaun AMP tenke halais dezenvolvimentu, liu-liu preokupasaun povu nian. Povu hakarak estrada di’ak,  be moos, irrigasaun, hamenus dezempregu, harii agrikultura ida sustentável, no asegura ai-han.

Ba Prezidente Partidu CNRT, Kay Rala Xanana Gusmão. Eis membru governu ne’e prefere, Xanana Gusmão, di’ak liu sai hanesan ministru senior hodi fó asesoria ba membru governu sira seluk.

Aleinde ida ne’e, konsentra de’it iha problema Fronteira Marítima, tanba problema refere sei presiza kapasidade Xanana Gusmão nian, hodi rezolve problema negosiasaun ho nasaun Indonézia inklui defende dada pipe line mai Timor-Leste.

“Se nia (Xanana-red) ba Primeiru Ministru, la iha fleksibilidade atu trata asuntu Fronteira Marítima ho dada Pipe Line. Nune’e sei buka fali tan negosiador foun, enkuantu Xanana iha kapasidade no kompeténsia. Tanba ne’e, Ha’u prefere Xanana Gusmão tuur hanesan ministru senior hodi fó konsellu ba governu tomak.”

“Taur iha kapasidade atu kontrola, liu-liu oinsá asegura produtividade no efisiénsia ho efikásia, servisu governu nian.” Nia reforsa. Hodi husu “se Taur Matan Ruak ba Primeiru Ministru, La bele fiar de’it relatóriu, di’ak liu tuun no haree rasik implementasaun projetu no halo inspesaun rotina ba servisu membru governu nian.”

Iha parte seluk, Leovigildo mós konsidera koligasaun AMP entrega kargu Primeiru Ministru, ba Prezidente PLP, Taur Matan Ruak nu’udar prosesu transferénsia jérasionál ne’ebé Xanana Gusmão antes ne’e nu’udar Primeiru Ministru halo ona ba Eis Primeiru Ministru Rui Maria de Araújo hosi partidu Fretilín.

(Ekipa Redasaun)

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here