TR Proklama Rezultadu EAP-AMP Primeiru Vensedor  

2
1307
Prezidente Tribunál Rekursu, Deolindo dos Santos, roklama rezultadu Eleisaun Antisipada Parlamentár, iha Kaikoli, ohin. Foto Tatoli/Egas Cristovão

DILI (TATOLI)—Bazeia akordeaun juis koletivu sira hanesan Deolindo dos Santos, Gillermino da Silva no Jasinta Correia da Costa, Aliansa Mudansa ba Progresu (AMP) sai  primeiru vensedor ba rezultadu Eleisaun Antisipada Parlamentár (EAP).

AMP iha akordeaun Tribunál, ba Eleisaun Antisipada Parlamentár (EAP) konsege rekolla votus hamutuk 309.663 korresponde 49,6 % hosi total  eleitores hamutuk,784,286 korresponde 100%, maibé taxa partisipasaun 635,116 korresponde 80.98%, nune’e AMP iha lejizlatura dalimak sei direitu ba 34 kadeira.

Partidu FRETILIN nu’udar segundu vensedor, tanba Fretilín rekolla votu hamutuk 213.324, korresponde ba 34,2%. Ho ida ne’e, Fretilín iha direitu ba kadeira PN hamutuk 23.

Partidu Demokrátiku (PD), iha de’it kadeira 5 ba Parlamentu Nasionál, tanba rekolla de’it votus 50.370, korresponde ba 8,1%.

Enkuantu Frente Dezenvolvimentu Demokrátiku (FDD) hetan kadeira 3 iha Parlamentu Nasionál iha lejizlatura dalimak. FDD rekolla votu iha EAP hamutuk 34.301, korresponde ba 5,5%.

“Desizaun mak ne’e, proklama sai ohin. Ohin sei notifika reprezentante lista kandidatura e publika iha jornál da repúblika. Kopia orsida bele hetan kedan,” Prezidente Tribunál Rekursu, Deolindo dos Santos informa iha Tribunál Rekursu, ohin.

“La haluha agradese no fó obrigadu barak ba ita boot sira. Ikus liu ita boot sira sei hetan notifikasaun ba ita boot sira nia interese ba prosesu tomak ida ne’e. Orsida bele hela tan kedan.”

Lori Tribunál Rekursu nia naran, Deolindo dos Santos agradese ba kooperasaun servisu instituisaun sira hanesan, Komisaun Nasionál Eleisaun, Sekretáriu Téknika Administrasaun Eleitorál, inklui Partidu Polítiku sira nia reprezentante.

“Ho apoiu tomak ne’ebé mak iha, ohin ita proklama rezultadu,” Nia esplika tan.

No deklara servisu TR hotu ona ba EAP mak ohin, ba oin órgaun seluk nia kompeténsia. Aproveita tempu nia agradese ba CNE, STAE, Partidu Politiku, ne’ebé apoiu TR to’o ohin proklama rezultadu.

Iha parte seluk, partidu hirak ne’ebé la konsege liu barreira 4% iha EAP mak hanesan; Partidu Esperansa patria-PEP, rekolla votu 5,060, korresponde ba 0.8%.

Partidu Repúblika-PR, rekolla votu hamutuk, 4,125 korresponde 0.7%. Movimentu Dezenvolvimentu Nasionál-MSD, iha votus hamutuk, 3,188 korresponde 0.5%. No Movimentu Dezenvolvimentu Nasionál-MDN, rekolla votu 4,494 (0.7%).

Entretantu iha EAP rejista, votus branco hamutuk 2.998, korresponde 0,47%, no votus nulu 7.544, korresponde 1,19%.

Jornalista : Zezito da Silva

Editór : Manuel Pinto

 

2 COMMENTS

  1. Hodi ASDT nia naran hau hato’o Parabens ba Sua Ex. Cia Presidente do Tribunal de Recurso RDTL, Sr. Deolindo dos Santos ho nia membru sira hotu neebe servisu makas to’o loron ohin oficialmente publika ona rezultadu EAP. Parabens mos ba Colegasaun AMP neebe sai nuudar vensedor primeiru lugar iha EAP 12 de Maiu de 2018, Parabens ba Povo Timor Leste tomak

  2. Favor ida usa pontos ho virgulas ho consistencia ou tuir regras nebe loos tanba iha noticia ne hau hare complicado tebes. Por exemplo:
    “309.663 korresponde 49,6 % hosi total eleitores hamutuk,784,286 korresponde 100%, maibé taxa partisipasaun 635,116 korresponde 80.98%,”

HUSIK IDA HATÁN