TDD Julga Eis-Vise Ministra Finansa Tanba Halo Pagamentu Ba Interese Emilia Pires

0
1246
Tribunál Distritál Dili. Foto site tribunais.tl

DILI, (TATOLI) – Tribunál Distritál Dili (TDD), ohin rona sasin hosi Direitór Nasionál Administrasaun Jerál Ministériu Finansa, Martinho Lopes, relasiona ho kazu akuzasaun ba eis-Vise Ministra Finansa, Santina Cardoso.

Santina Cardoso hetan akuzasaun hosi Ministériu Públiku, tanba aprova osan ho montante $1,900.00 hodi selu publisidade ho kontiúdu komunikadu imprensa ne’ebé públika iha jornál sira, konsidera la’ós interese Estadu.

Nota imprensa hosi eis-Ministra Finansa, Emilia Pires, kontesta publikasaun Tempo Semanal ne’ebé divulga kazu Korupsaun, Koluzaun no Nepotismu (KKN) iha Ministériu Finansa (MF).

Durante audénsia, sasin Martinho Lopes haktuir katak laiha koñesementu ba asuntu ne’e.

“Ha’u la iha koñesimentu, maibé despasu tun hosi leten ha’u haree de’it logo ofisiál hanesan RDTL no ministériu finansa nian depois asina direta, maibé ha’u la lee konteudu hosi karta ne’e”, katak.

Sasin ne’e hatutan publisidade ne’e kuandu públika ona iha jornál sira mak foin haree didiak.

Martinho rekoñese asina duni kustu ba visualizasaun (CPV) maibé kompeténsia aprova ne’e vise-ministra, Santina Cardoso.

Nune’ mós kandidatu ba sasin Eujevio Pereira, jornalista hosi jornál Independente haktuir MF halo pagamentu ba publisidade ne’ebé públika iha Independen liuhosi Banku ANZ ho númeru TPO (Kode Finansa) 14235011.

“Ohin ha’u mai sasin, tanba uluk ha’u mak simu komunikadu hosi mídia officer ministériu finansa, Fernando Ribeiro, hodi distribui ba mídia sira hodi publika”, haktuir ba jornalista sira.

“Ha’u simu karta (komunikadu) ne’e iha Palásiu Governu iha 4 agustu 2014, ha’u rona dehan hetan autorizasaun hosi vise MF, Santina Cardoso”.

Publisidade ne’e públika iha instituisaun mídia haat hanesan Business Timor, Suara Timor Lorosa’e (STL), Timor-Post no Independente.

Eujevio nu’udar sasin ba arguida sei fó ninia desklarasaun iha loron 27 fulan-juñu, tuku 16.00.

Julgamentu ne’e prezide hosi juiz prezidente, Jumiati Freitas, juiz membru Albertinha Neves no António Helder. Ministériu Públiku reprejenta hosi prokuradór, Rogerio Viegas Vicente. Arguida akompaña hosi ninia advogadu Sahe da Silva ho Nuno Marrazes.

Santina Cardoso simu responsabilidade nu’udar membru governu iha fulan-agostu 2012 to’o fevereiru 2015.

Jullu 2014, MP akuza Emilia Pires prátika krime partisipasaun ekonómika iha negósiu ho krime administrasaun danosa, ho númeru prosesu NUC 1212/12.PDDIL.

Bainhira Emilia Pires hetan akuzasaun, nia la konkorda hodi konsidera la loos. Tanba ne’e iha loron 4 fulan-agostu 2014, halo konferénsia imprensa hodi deklara ba mídia hasoru akuzasaun MP.

Momentu hanesan, deklarasaun ne’e públika iha jornál STL, TP no Independente hanesan publisidade.

Iha loron 8 fulan-agustu 2014, jornál Independente públika hikas ho file dokumentu 16.

Iha loron 11 no 17 fulan-agostu 2014 deklarasaun ne’e fó sai iha jornál Business Timor iha parte publisidade, dok.fls.69.

Ho publisidade ne’e, parte jornál sira hatama fatura komersiál (invoice) ba MF, hanesan STL ho montante $700.00, Independen ho montante $300.00 no Business Timor ho montante $600.00.

Ho nota ne’ebé tama ba MF, arguida nu’udar vise-ministra halo autorizasaun hodi prepara CPV tuir invoice sira ne’ebé tama.

Iha loron 12 fulan-agostu 2014, ministériu prepara CPV ba jornál Independen ne’ebé asina hosi Martinho Lopes nu’udar Diretór Administrasaun no Finansa no sertifika hosi Norberto S. Da Costa, nu’udar Diretór Jerál, no iha loron 13 fulan-agostu 2014 autoriza no aprova hosi arguida Santina Cardoso, nu’udar Vise-Ministra Finansa.

Iha loron 14 fulan-agostu 2014, MF prepara CPV ba jornál Busines Timor ne’ebé asina hosi Martinho Lopes nu’udar Diretór Administrasaun no Finansa no sertifika hosi Norberto S. da Costa, iha loron 21 fulan-agostu 2014 autoriza no aprova hosi arguida nu’udar Vise-Ministra.

Iha loron 5 fulan-setembru 2014, MF prepara CPV ba jornál Timor Post ne’ebé asina hosi Martinho Lopes nu’udar Diretór Administrasaun no sertifika hosi Norberto no aprova hosi arguida nu’udar Vise-Ministra.

Bainhira prodús tiha CPV ne’ebé hetan ona autorizasaun no aprovasaun hosi arguida, iha loron 14 fulan-agostu 2014, MF prepara pedidu pagamentu ba jornál Independen ho montante $300.00.

Iha loron 22 fulan-agostu 2014, MF prosesa pedidu pagamentu ba jornál Business Timor ho $600.00, iha loron 9 fulan-setembru 2014, MF prosesa pedidu pagamentu ba jornál Timor Post ho $300.

Iha loron 25 fulan-setembru 2014, MF prosesa pedidu pagamentu ba jornál STL ho $700.00.

Orsamentu ne’ebé arguida autoriza no aprova hodi halo pagamentu ba jornál sira ho montante $1,900.00.

Deklarasaun sira ne’ebé mak Emilia Pires halo iha jornál, MP konsidera la iha interese komum ba MF sá tan ba Estadu RDTL

Arguida hetan akuzasaun ho kódigu penal artigu 274 (administrasaun danoza) alinea 1) ema ne’ebé, kuandu iha obrigasaun atu fó-destinu ka administra ema-seluk nia interese, servisu ka bem patrimoniál, maski nia mós sosiedade ka pessoa koletiva ne’ebé soi interese, servisu ka bem sira-ne’e nia sósiu, hamosu prejuizu patrimoniál signifikativu ekonomikamente tanba nia viola intensionalmente regra kona-ba kontrole ka jestaun ka aktua ho violasaun grave ba devér kona-ba nia funsaun, sei hetan pena prizaun tinan ida to’o tinan haat.

Alinea 2) bem, interese ka servisu referidu iha númeru anterior Estadu, pesoa koletiva ho utilidade públika, kooperativa ka asosiasaun populár nian karik, ajente sei hetan pena prizaun tinan rua to’o tinan neen.

Alinea 3) pena sira-ne’e sei aplika mós ba ema ne’ebé halo ninian ka husik ema-seluk halo ninian, ilejitimamente, koiza ne’ebé nia bele fó-destinu tuir de’it finalidade ne’ebé ema ne’ebé administra ema-seluk nia patrimóniu tenke tuir.

Artigu 297 (abuzu poder) funsionáriu ne’ebé abuza podér ka viola obrigasaun, ne’ebé mai hosi funsaun ne’ebé nia kaer, atu hetan benefísiu ba nia ka ba ema-seluk ka hamosu prejuizu ba ema-seluk sei hetan pena prizaun tinan 1 to’o tinan 4, kuandu dispozisaun legál seluk la haruka aplika pena todan liu.

Jornalista: Zezito Silva
Editora: Rita Almeida

HUSIK IDA HATÁN