Sosiedade Sivíl Husu VIII Governu Hasa’e Orsamentu Edukasaun

0
306
Prezidente organizasaun Kadalak Timor-Leste , Natalino de Jesus Dias. Foto FB: Natalino de Jesus

DILI, (TATOLI)-Prezidente organizasaun Kadalak Timor-Leste , Natalino de Jesus Dias akresenta katak governu konstitusionál da-walu ne’ebé sei mai presiza toma atensaun ba rekursu umanu, liuhusi aumenta Orsamentu Jerál Estadu (OJE) ba setór edukasaun, tanba antes ne’e OJE alokadu ba Ministériu Edukasaun, menus husi porsentu 20.

“OJE ba edukasaun presiza aumenta tanba tuir ha’u-nia observasaun rekursu umanu ne’e baze fundamentál. Se investimentu menus afeta ba kualidade dezenvolvimentu. Tanba ne’e, tenke investe iha rekursu umanu,” dehan prezidente Kadalak, Natalino de Jesus Dias, ba Ajénsia TATOLI, horisehik loro raik, iha Becora-Díli.

Nia akresenta liutan katak ho governu ne’ebé sei mai bele garante liután dezenvolvimentu ne’ebé ho kualidade. Maibé atu garante Dezenvolvimentu ne’ebé kualidade mai husi rekursu umanu ne’ebé kualidade mós.

“Ha’u hanoin katak tenke hala’o formasaun karakter ba sidadaun sira atu nune’e bele iha liután konxiénsia nu’udar sidadaun timoroan,” dehan lider másimu organizasaun ho lema Sulimutu sai Ida ne’e.

Nia rekoñese katak oras ne’e timoroan sira mós matenek barak ona, maibé seidauk uza “Matan fuan” nian ho efetivu hodi hala’o dezenvolvimentu tanba haree liu ba kestaun lukru, nune’e afeta fila fali ba dezenvolvimentu rasik.

Iha no hala’o ona Planu Estratéjiku Dezenvolvimentu Nasionál (PEDN), maibé presiza iha buat balun ne’ebé ita presiza hadi’a, liuliu oinsá atu hasa’e kualidade rekursu umanu kada ministériu para nune’e atu bele masimiza dezenvolvimentu ne’ebé la’o, hodi lais liután.

Sidadaun sira ne’ebé sei sai governante iha governu da-walu, fó kontribuisaun ka serbisu la’ós tanba atu manan osan, maibé oinsá bele konsensializa. Atu dezenvolve, konstrui no trata dezenvolvimentu Timor-Leste la’ós de’it ba tinan rua ka tolu, maibé garante kualidade ba tinan lima, sanulu ka liu iha área hotu.

“Tanba ne’e ema sira ne’ebé mai atu governa da-walu tenke toma atensaun ba rekursu umanu dezenvolvimentu ida di’ak liu,” konklui prezidente Kadalak, Natalino de Jesus Dias.

Organizasaun Kadalak Timor-Leste ho lema Sai Ida Sulimutuk nu’udar organizasaun ne’ebé estabelese husi inisiativa eis-seminarista timoroan sira, iha Fevereiru tinan kotuk.

Jornalista: Rafy Belo

Editór : Manuel Pinto

HUSIK IDA HATÁN