PR Rona Opiniaun Membru KSDS Kona-ba Promosaun Koronel Haat

0
352
Membru Konsellu Superior Defeza no Seguransa (KSDS) hala’o reuniaun ba daruak iha Palásiu Prezidente Nicolau Lobato, ohin. Imajen Mídia PR.

DILI, (TATOLI) – Prezidente Repúblika (PR), Francisco Guterres Lú Olo, segunda ne’e iha Palásiu Prezidente Nicolau Lobato, Bairru Pité, prezide reuniaun Konsellu Superior Defeza no Seguransa (KSDS) hodi rona membru KSDS nia opiniaun kona-ba promosaun koronel na’in haat ba brigadeiru jenerál.

Koronel na’in haat ne’ebé atu hetan promosaun ba brigadeiru jenerál maka Falur Rate Laek, Sabika Bessi Kulit, Aluk Descartes no Maunana.

“Membru Konsellu Superior Defeza no Seguransa hotu-hotu fó sira-nia hanoin kona-ba promosaun ida ne’e. Tuir lei, proposta ne’e mai hosi Governu no Prezidente bele promove, tenke konsulta ba Konsellu Superior Defeza no Seguransa nu’udar orgaun konsulta Prezidente Repúblika nian”, Xefe Kaza Militár Prezidénsia Repúblika, Koronél António da Silva Soares Maucalo, ba jornalsta sira hafoin reuniaun.

Maucalo haktuir Prezidente Repúblika sei uza kompeténsia prerrogativa ne’ebé nia iha atu bele desidi katak promove ka la promove no se aprova karik nia sei fó sai hosi dekretu prezidensiál.

Iha reuniaun ne’e, aprova akta reuniaun ne’ebé uluk halo ona, liu-liu rekondusaun mandatu Majór Jenerál FALINTIL-Forsa Defeza Timor-Leste, Lere Anan Timur, iha tinan kotuk.

Entretantu, iha reuniaun ne’e, la marka prezensa membru KSDS na’in rua: José Ramos Horta no Merício dos Reis.

Membru Konsellu Superior Defeza no Seguransa hamutuk ema na’in-14, mak hanesan: Prezidente Repúblika, Francisco Guterres Lú Olo, Primeiru Ministru, Marí Alkatíri, Ministru Negósiu Estranjeiru no Kooperasaun, Aurélio Guterres, Ministru Estadu no Konselleiru ba Seguransa Nasionál, José Ramos Horta, Ministru Defeza no Seguransa, José Agostinho Sequeira Somotxo, Ministra Justisa, Ângela Carrascalão, reprezentante na’in tolu hosi Parlamentu Nasionál: David Dias Ximenes, Jacinto Viegas Vicente Roque, Merício dos Reis, Xefe Estadu Majór Jenerál Forsas Armadas, Majór-Jenerál Lere Anan Timur, Komandante Jerál PNTL, Komisáriu Júlio da Costa Hornay, Diretór Jerál Serbisu Intelijénsia (SNI), Manuel Serrano.

Sidadaun na’in rua ne’ebé nomeia hosi Prezidente Repúblika: Cornélio Gama L7 no Cristina Alves da Silva.

Jornalista: Xisto Freitas

Editora: Rita Almeida

HUSIK IDA HATÁN