DILI (TATOLI)–Komandu Polísia Nasionál Timor-Leste (PNTL), Ohin, Kinta (10/05) hala’o serimónia dezlokasaun ba membru PNTL hodi fó apoiu seguransa ba iha Eleisaun Antisipada Parlamentár (EAP)2018 iha territóriu Timor laran tomak.
Serimónia dezlokasaun ne’e dirije direita hosi Komandante Jerál PNTL Komisáriu Polísia Julio da Costa Hornay, iha Kuartél Jerál PNTL.
Julio Hornay dehan membru PNTL ne’ebé ohin komandu dezloka to’o iha munisípiu tenke submete ba orden komandu munisípiu nian.
“Ita bo’ot sira sei koloka iha sentru votasaun sira tuir programa ne’ebé Komandu munisípiu prepara ona ba ita bo’ot sira, to’o iha ne’ebá Komandu Munisípiu sira maka iha responsabilidade másimu hodi haree, koloka, kontrola kona-ba servisu sira ne’ebé maka ita bo’ot sira sei désentende iha sentru votasaun iha munisípiu 13,” Komandante Jerál PNTL ne’e esplika.
Aleinde de ida ne’e, Komisariu Julio da Costa Hornay husu atu membru tomak ne’ebé hala’o kna’ar ida ne’e atu hala’o kna’ar ho responsabilidade másimu tuir misaun ne’ebé PNTL iha.
Hatudu nafatin dixiplina servisu, bainhira PNTL hala’o knaar iha sentru votasaun ne’ebá. Hatudu neutralidade, imparsialidade iha servisu laran, ida ne’e maka importante.
Husu atu membru sira ne’ebé maka dezloka ba munisípiu atu bele halo koordenasaun ho autoridade lokál iha munisípiu, parte Comissão Nacional Eleição (CNE), parte Sekretariadu Tékniku Administrasaun Eleitorál (STAE) no sira ne’ebé maka iha responsabilidade kona-ba eleisaun atu bele halo servisu ho di’ak to’o ba iha rohan.
Julio da Costa Hornay, alerta ba públiku katak kuandu ema ruma koko halo krime ruma iha sentru votasaun, seguransa sira prontu hatán ka la fó toleránsia ba hahalok krime.
“Lei hateten klaru kona-ba misaun seguransa nian, ema ruma koko atu halo krime iha sentru votasaun ka hakarak estraga lalauk eleisaun, seguransa sira prontu ezekuta hodi fo solusaun, la iha rezerva ka sei la fó toleránsia.”
Partisipa iha serimonia deslokasun ne’e Komandante Jerál akompaña husi Segundu Komandante Jerál, Inspector Jerál, Komandante Administrasaun, Komandante Operasaun, Komandante Unidade, Komandante Munisipiu, Ofisias Superiores, Ofisias Subalternu, Sarjentu no ajente PNTL.
Jornalista : Zezito Silva
Editór : Manuel Pinto