MNEK Hato’o Relatóriu Polítika Externa Ba Xefe Estadu

0
89
Ministru Negósiu Estranjeiru no Kooperasaun (MNEK), Aurélio Cristóvão Guterres, aprezenta relatóriu serbisu MNEK nian ba Prezidente Repúblika, Francisco Guterres Lú Olo. Imajen Mídia Palásiu PR.

DILI, (TATOLI) – Ministru Negósiu Estranjeiru no Kooperasaun (MNEK), Aurélio Cristóvão Guterres, hato’o relatóriu serbisu MNEK nian durante fulan ualu ba Prezidente Repúblika, Francisco Guterres Lú Olo.

Relatóriu ne’ebé nia hato’o liuliu ligasaun ho serbisu polítika externa Timor-Leste nian ho rai liur iha nível bilaterál, rejionál nomós nível multilaterál nomós ligasaun ho reforsu ka dezenvolvimentu institusionál iha ministériu nia laran rasik.

“Ligasaun ho relasaun bilaterál ho nasaun amigu sira la’o ho di’ak tuir planu ne’ebé maka iha. Nune’e mós relasaun ho rejionál ne’ebé iha ita kontinua reforsa ita nia kooperasaun ho Komunidade Nasaun Ko’alia Lian Portugés (CPLP-sigla portugés), halo preparasaun adezaun ba AZEAN”, Aurélio ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin enkontru ho Xefe Estadu.

Iha nível multilaterál, nia haktuir kontinua reforsa serbisu sira ne’ebé ligasaun ho Nasoens Unidas nian no iha nível internu kontinua hadi’a sistema rasik iha área jestaun, administrasaun, reforsa rekursu umanu iha ministériu nia laran rasik no formasaun kontinua ba diplomata sira.

Iha biban ne’e, Aurélio hatutan progresu ne’ebé MNEK konsege atinje iha fulan ualu nia laran maka estabelese kuadru legál balun liuliu ezbosu lei kona-ba protokolu Estadu ne’ebé hein de’it atu lori ba Konsellu Ministru atu hetan aprovasaun.

Kestaun seluk, nia dehan prepara livru mutin (white paper) polítika externa Timor-Leste nian ne’ebé presiza konsulta tan ho Gabinete Prezidente Repúblika no Parlamentu Nasionál, nune’e bele sai hanesan matadalan ba polítika internasionál Timor ninian.

Jornalista: Xisto Freitas

Editora: Rita Almeida

HUSIK IDA HATÁN