Lere Hato’o Parabéns Ba Partidu Vensedór

0
384
Xefe Estadu Maior FALINTIL–Forsa Defeza Timor-Leste (F-FDTL), Majór Jenerál Lere Anan Timur, bainhira hatan jornalista sira iha Palásiu Prezidente Nicolau Lobato Bairo Pité. Foto mídia PR.

DILI, (TATOLI) – Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, hato’o parabéns ba partidu ne’ebé manán eleisaun.

“Ha’u fó parabéns ba partidu ne’ebé manán iha eleisaun antesipada no liu-liu fó parabens ba ita nia povu ne’ebé maka bele hili ninia lider sira ne’ebé di’ak atu lori Nasaun ne’e ba dezenvolvimentu”, Eis Komandante Gerilleiru ne’e hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e, relasiona ho rezultadu eleisaun antesipada ne’ebé indika partidu koligasaun Aliansa Mudansa ba Progresu (AMP) manán iha sufrájiu.

Lere hatutan : “Manán eleisaun la signifika susesu ba serbisu, povu hili ita atu ba serbisu no povu haree maka ita nia serbisu, iha susesu ka lae”.

Majór Jenerál ne’e dehan promesa ne’ebé halo iha kampaña hanesan hadi’a estrada, dada kadoras, bee-moos ba povu, tau matan ba oan ki’ak no veteranu tenke realiza, maibé ukun tinan ida ka rua maka la konsege kumpri, ne’e povu bele lakon konfiansa.

Lere afirma partidu sira ne’ebé lakon sai opozisaun iha Parlamentu Nasionál apoiu governu atu lori Estadu no Nasaun ba oin.

“Ida ne’e la’ós tanba kadeira. Hanesan baibain ita dehan foti interese nasionál ne’e aas liu duké interese ema ida-idak nian. Ita tenke hadomi ita nia Nasaun, ita tenke respeita ita nia lider nasionál sira”, tenik.

Lere fiar katak Kay-Rala Xanana Gusmão, Marí Alkatiri, Ramos Horta no Taur Matan Ruak sei lori Nasaun ne’e ba oin no sei hatudu dalan di’ak ba jerasaun foun.

Jornalista: Xisto Freitas

Editora: Rita Almeida

HUSIK IDA HATÁN