La’o Hamutuk Sujere Opozisaun Forte Iha PN

0
277

DILI, (TATOLI) – Organizasaun Naun Governamentál, La’o Hamutuk, sujere atu lejislatura da-lima iha opozisaun ne’ebé forte iha Parlamentu Nasionál (PN).

“La’o Hamutuk sujere iha opozisaun ne’ebé forte iha Parlamentu Nasionál, nune’e bele haforsa liután check and balance ka separasaun poder iha Parlamentu Nasionál no iha Governu”, refere komunikadu La’o Hamutuk ne’ebé redasaun TATOLI simu, ohin.

La’o hamutuk mós enkoraja atu futuru kontinua hala’o kampaña sira ho maneira diskusaun, diálogu no debate nakloke sira hodi asegura transparénsia no akontabilidade ba polítika sira ne’ebé liga ho povu no nasaun nia vida.

La’o Hamutuk hato’o mós parabéns ba povu ne’ebé hatudu ona vontade di’ak liu hodi akompaña no rona ideia oinoin hosi partidu no koligasaun sira nu’udar rekursu hodi aprende, aprezenta kestaun no husu konfirmasaun ho maneira diálogu hodi evita konflitu no violénsia.

La’o Hamutuk kongratula Sekretariadu Tékniku Administrasaun Eleitorál (STAE) no Komisaun Nasionál ba Eleisaun (CNE-sigla portugés) ne’ebé organiza ona Eleisaun Antesipada Parlamentár ho transparente no imparsiál.

Hadi’a Liutan Kampaña Polítiku Sira

Iha komunikadu ne’e haktuir, La’o Hamutuk hetan kredensiál hosi STAE no CNE atu halo observasaun ba eleisan antesipada ne’e no hala’o observasaun durante tempu kampaña no iha loron eleisaun nian.

Momentu ne’e La’o Hamutuk koloka observadór ema na’in 14 iha sentru votasaun sira iha Munisípiu Dili, Baukau, Manatutu, Lospalos no Rejiaun Administrativa Espesiál Oekusi Ambenu.

Objetivu hosi observasaun ne’e haree katak timoroan hotu liu liu votante sira bele akompaña no aprende kona-ba programa hosi partidu no koligasaun sira iha tempu kampaña nian ho livre no nakloke, nune’e mós haree katak eleisaun hala’o ho transparente no tuir duni lei no regra sira.

Hosi parte tékniku nian La’o Hamutuk observa STAE no CNE hala’o duni sira nia knaar ho imparsiál, tuir prosesu no regras sira, hahú hosi simu rejistu ba partidu polítiku no koligasaun sira ne’ebé hakarak atu kompete iha eleisaun to’o prosesu kontajen votu.

Maski nune’e La’o Hamutuk mós haree katak iha buat balun ne’ebé sei presiza hadi’a liután.

Servisu importante sira ne’e inklui oinsá asegura prosesu kampaña ne’ebé edukativu liután liuhusi fahe sira nia programa no polítika ba povu, prevene habelar informasaun falsu sira ne’ebé tenta atu kestiona kredibilidade STAE no CNE nian, nune’e mós disiplina iha oinsá atu manán povu sira nia votu liuhusi hala’o kampaña ne’ebé justu no bazea ba informasaun sira ne’ebé tuir faktu.

Atu prosesu konstrusaun demokrasia ida ne’e la’o ho di’ak, povu tenke hili tuir konsiénsia. La’o Hamutuk fiar katak mídia iha mós papél boot atu kontribui ba prosesu ne’e.

La’o Hamutuk hakarak fó parabéns ba partidu no koligasaun sira ne’ebé manán ona iha eleisaun ida ne’e, La’o Hamutuk hein katak sei reprezenta duni povu nia interese iha Parlamentu Nasionál, no kumpre promesa sira ne’ebé fó ona ba povu durante tempu kampaña.

La’o Hamutuk fó mós parabéns ba partidu no koligasaun sira seluk ne’ebé la konsege manán votu ne’ebé sufisiente atu tuur iha Parlamentu Nasionál ba periodu ne’e.

“Ami agradese ba partisipasaun di’ak ne’ebé Partidu Polítiku no Koligasaun sira ne’e hatudu liuhusi hola parte iha debate sira iha TVE, ne’ebé modera hosi organizasaun Sosiedade sivíl, hodi hatán pergunta esensiál ba asuntu espesífiku sira hodi Povu bele akompaña no husu pergunta iha tempu kampaña nia laran”, La’o Hamutuk agradese.

Jornalista: Rafy Belo

HUSIK IDA HATÁN