Konsellu Ministru Mak Deside Naran Ba Ró Patrollamentu

0
533
Foto espesiál

DILI, (TATOLI) – Primeiru-Ministru, Marí Alkatiri, hatete Konsellu Ministru (KM) mak bele deside naran ba ró patrullamentu, la’ós ministru.

“Ne’e la’ós kompeténsia ministru ida nian hodi indika naran tuir ninia hakarak. Tanba ne’e maka ha’u dehan se Konsellu Ministru la deside, entaun hein lai bainhira Konsellu Ministru halo enkontru maka deside atu fó naran saida”, Xefe Governu esklarese ba jornalista sira iha sede Komité Sentral FRETILIN, Komoro, ohin.

Alkatiri hatutan Governu deside apaga naran Kay-Rala Xanana Gusmão hosi ró patrollamentu ba Unidade Polísia Marítima (UPM) ne’ebé ajuda hosi nasaun doadór balun tanba KM uluk seidauk deside naran ba ró ne’e.

“Kuandu ró ne’e to’o ha’u buka hatene ba Konsellu Ministru uluk ne’e deside buat ruma ba ró ne’e nia naran ka lae. Maibé, Primeiru-Ministru Sestu Governu Konstitusionál, Rui Maria de Araújo, klarifika katak nia nein hatene tan ró ne’e atu mai”, afirma.

Xefe Ezekutivu ne’e dehan akordu ne’e Ministru Seguransa iha altura ne’ebá, Longuinhos Monteiro, maka halo ho nasaun doadór balun depois Longuinhos rasik maka unilateralmente indika naran ba ró refere.

Tanba ne’e, saida mak akontese, Marí Alkatiri katak la’ós kontra naran, maibé koensedénsia ne’ebé furak loos maka ró ne’e to’o ho Kay-Rala Xanana nia naran iha tempu kampaña.

“Ne’e signifika saida? Ha’u hanoin Xanana mós la kontente tanba buat ne’e la loos, entaun nia (Xanana) rasik la reazen”, tenik.

Alkatiri salienta Governu sei tau eroi sira ne’ebé mate ona nia naran ba ró ne’e, maibé la’ós eroi sira ne’ebé sei moris.

Jornalista: Xisto Freitas

Editora: Rita Almeida

HUSIK IDA HATÁN