iklan

NASIONÁL, EKONOMIA, DILI, MUNISÍPIU

Konetividade Aérea no Marítima Importante ba Futuru Dezenvolvimentu

Konetividade Aérea no Marítima Importante ba Futuru Dezenvolvimentu

Foto/Google.

DILI (TATOLI)- Xefe Unidade Misaun no Reprezentante Estadu, João Gonçalves, hatete aspetu prinsipál iha serbisu triángulu entre Timor-Leste, Austrália no Indonézia mak konetividade aérea no Marítima importante tebes ba futuru dezenvolvimentu país ne’e.

“Entaun ita tenke prepara di’ak ba ida ne’e. Iha Timor-Leste ita sei iha ki’ak maka’as, ne’ebé ami iha planu ida oinsá mak ita bele ko’alia hodi estabelese koridór ekonómiku ida tanba ita iha ligasaun ba Kupang. Karik aban-bainrua iha highway ida husi Lospalos bele bá to’o Kupang ida ne’e sei lori vantajen ekonómika ida boot tebes ba ita-nia rai ho Nusa Tenggara Timur”, João dehan ohin, iha nia knaar fatin Landmark, Dili.

Nune’e kestaun ne’e iha hela planu asaun misaun triángulu nian entre nasaun tolu ne’e. “Maibé ami hakarak foku ba dezenvolvimentu ne’e kuandu hala’o povu mak tenke hetan benefísiu no buat hotu tenke konsulta no la’o hamutuk ho populasaun iha fatin ne’ebé de’it”.

Eis governante ne’e relata bainhira halo sorumutu ho Asian Development Bank (ADB) kona-ba estudu ida sobre integrated trades iha fronteira sira ne’e tenke iha envolvimentu husi populasaun rasik no foku iha sira tanba sira mak sai benefisiária ba ida ne’e.

“Ita tenke halo hamutuk no prepara sira, saida mak sira hakarak ajuda para aban-bainrua bele dezenvolve sira-nia aan rasik”.

Sobre konetividade aérea husi Timor-Leste ba Austrália (Darwin) ho presu ne’ebé karun, João husu Governu atu akordu aviasaun halo lalais para depois iha ona posibilidade ba ligasaun aérea hanesan husi Indonézia mai Dili bá to’o Darwin.

“Ha’u fiar metin kuandu ida ne’e akontese ona kustu aviasaun ne’e Darwin-Dili ne’e sei tuun maka’as, buat sira ne’e ami ko’alia iha enkontru, maibé agora iha fórum emprezariál ha’u sei dezafia ita-nia emprezáriu timoroan sira para buka ona ró ida ne’ebé halo ligasaun Dili-Darwin”.

Ho ida ne’e bele halo kompetisaun ho presu aéreu nian atu presu viajen bele menus.

Jornalista : Maria Auxiliadora

Editór : Manuel Pinto

iklan
iklan

Leave a Reply

iklan
error: Content is protected !!