DILI, (TATOLI) – Klínika Bairru Pité hetan ona tulun osan kuaze rihun 30 hosi doadór, organizasaun sosiedade sivíl, kompañia nasionál, ajénsia internasionál, timoroan iha rai-laran no rai-liur hodi rezolve krize finanseira ne’ebé akontese.
Diretór Klínika Bairru Pité, dr. Daniel Murpy, hateten mesmu hetan ona tulun maibé sei la garante sustentabilidade finanseira klínika ba futuru. Tanba ne’e presiza intervensaun Governu hodi tau iha programa orsamentu Estadu kada tinan.
“Ida ne’e presiza governu atu hatama klínika Bairru Pité iha orsamentu Estadu hodi garante ninia sustentabilidadeʺ, dehan ba jornalista ajénsia Tatoli iha Bairru Pité, ohin.
Murpy esplika orsamentu ne’e sei uza hodi selu saláriu funsionáriu, parteira, médiku no dotor tanba la simu saláriu durante fulan tolu.
ʺAmi la selu staf durante fulan tolu ona, fulan ida ami bele selu to’o rihun 20 tanba ne’e orsamentu nee’ seidauk to’oʺ, esklarese.
Tuir Fundadór ne’e seidauk re-ativa fatin maternidade, tuberkulose no baixa tanba sei kontinua enfrenta krize finanseira. Mesmu nune’e prosesu konsulta ba pasiente sira la’o normál maibé problema falta aimoruk antibiotik forte, vitamina no seluktán maka laiha.
ʺAimoruk falta barak, SAMES (Servisu Autonomu Medikamentu no Ekipamentu Saúde) dala ruma fó maibé aimoruk menus, tanba ne’e ha’u buka doadór hosi Amerika, Austrália hodi hetan tulunʺ, hatutan.
Diretór Klínika ne’e agradese ba apoiu hosi entidade hotu hodi hakmaan ona krize finanseira ne’ebé akontese.
Tuir dadus klínika Bairru Pité hetan tulun hosi kompañia Perissos, Oxfam, kompañia Travel Agency.Lda, Red Line, Timor Holding, Xanana Reading Room, Grupu Joven Lafaek, Timor Leste Estudant Association in New Zeland, Estudante UNTL, UNITAL, ICS, UNPAZ, Junior Chamber Internasionál, Forsa Voluntáriu apoiu Klínika Bairru Pité; Movimento Solidaridade salva Klínika Bairru Pité, ekipa buka fundus, pasiente sira no timoroan iha Inglatera.
Jornalista: Agapito dos Santos
Editora: Rita Almeida