“Ha’u Kontinua Nafatin Sai Prezidente Ba Povu Tomak”

0
1209
Prezidenti Repúblika, Francisco Guterres Lú-Olo. Imajen Mídia PR

DILI (TATOLI)—Prezidente Repúblika, Francisco Guterres Lú Olo hateten nia kontinua mantein ninia pozisaun nu’udar Prezidente Repúblika ba povu tomak bazeia ba kompromisu ne’ebé antes ne’e nia deklara ona.

“Ha’u kontinua nafatin sai prezidente ba povu tomak maibé la’ós prezidente ba ema ida ka ema rua. Ha’u sei halo kna’ar tuir de’it Konstituisaun no Lei haruka,” Xefe Estadu hato’o kestaun ne’e ba jornalista sira iha Igreja Motael, Dili, sesta ne’e, bainhira hatán líder partidu polítiku balun ne’ebé husu Prezidente Repúblika atu labele haliis ba partidu ida maibé tenke sai prezidente ba povu tomak.

Kona-ba rezultadu eleisaun antesipada, nia dehan, nia lakohi komenta uluk tanba Komisaun Nasionál Eleisaun (CNE-sigla Portugés) foin finaliza apuramentu nasionál no sei haruka fali ba Tribunál Rekursu atu hetan validasaun.

“Hafoin hetan validasaun hosi Tribunál Rekursu, partidu koligasaun ne’ebé manán eleisaun sei forma Governu, nomeia primeiru ministru no membru governu, depois sei ba Parlamentu Nasionál atu loke Kinta Sesaun Lejizlatura no sei deskuti asuntu barak tan,” Lú Olo haklaken.

Iha fatin hanesan, Prezidente Tribunál Rekursu, Deolindo dos Santos afirma hafoin prazu liu tiha oras 48, CNE sei haruka rezultadu eleisaun ba Tribunál Rekursu tarde liu iha segunda semana oin no iha oras 72 nia laran Tribunál Rekursu sei haree fila fali.

Nia esplika, kuandu iha rekursu ka reklamasaun ruma, Tribunál Rekursu sei haree kestaun hirak ne’e depois deside no ikus maka Tribunál Rekursu sei proklama rezultadu eleisaun tarde liu iha loron 28 Maiu 2018.

Deolindo tenik, to’o oras ne’e, seidauk iha prosesu ka reklamasaun ruma ne’ebé dirije direta ba Tribunál Rekursu.

Entretantu, CNE finaliza ona apuramentu nasionál iha kinta kalan. Rezultadu provizóriu ba apuramentu nasionál CNE nian maka totál votu ne’ebé konfirmadu maka partidu Aliansa Mudansa ba Progresu (AMP) hetan votu hamutuk 309.663 (49,6%), partidu Frente Revolusinária Timor-Leste Independente (Fretilin) ho votu 213.324 (34,2%), Partidu Demokrátiku (PD) ho votu 50.370 (8,1%), partidu Frente Dezenvolvimentu Demokrátiku (FDD) hetan votu 34.301 (5,5), Partidu Esperansa Pátria (PEP) ho votu 5.060 (0,8%), partidu Movimentu Dezenvolvimentu Nasionál (MDN) ho votu 4.494 (0,7%), Partidu Repúblikanu (PR) ho votu 4.125 (0,7), Movimentu Sosiál Demokrata (MSD) ho votu 3.188 (0,5%).

Nune’e, distribuisaun kadeira ba partidu ka koaligasaun partidária maka partidu AMP hetan kadeira 34, Fretilin ho kadeira 23, PD ho kadeira 5 no FDD kadeira 3.

Jornalista: Xisto Freitas

Editór : Manuel Pinto

HUSIK IDA HATÁN